- RBI કરન્સી ચેસ્ટ કૌભાંડ: 2.20 કરોડની રોકડ સાથે જોઈન્ટ કસ્ટોડિયનની ધરપકડ, જાણો કેવી રીતે આપ્યો ચોરીને અંજામ
- અમદાવાદમાં 8.70 કરોડની હાઈપ્રોફાઈલ બેંક ચોરી, LCB ઝોન-3 દ્વારા મુખ્ય આરોપી જેલના સળિયા પાછળ
- ઇ-કુબેર પોર્ટલમાં ગોલમાલ કરી જોઈન્ટ કસ્ટોડિયને જ ઉડાવ્યા 8.70 કરોડ, બેંકની સુરક્ષા વ્યવસ્થા સામે સવાલ
અમદાવાદ: શહેરના કાલુપુર-ગાંધીરોડ વિસ્તારમાં આવેલી બેંક ઓફ બરોડાની RBI કરન્સી ચેસ્ટમાં એક મસમોટા કૌભાંડનો પર્દાફાશ થયો છે. અંદાજિત ₹8 કરોડ 70 લાખની આસપાસની આ ચોરીમાં લોકલ ક્રાઈમ બ્રાન્ચ (LCB) ઝોન-3ની ટીમે મોટી સફળતા મેળવી છે. પોલીસે આ કેસના મુખ્ય સુત્રધારને ₹2.20 કરોડની માતબર રોકડ રકમ સાથે દબોચી લીધો છે. ચોંકાવનારી બાબત એ છે કે, ઝડપાયેલો આરોપી અન્ય કોઈ નહીં પરંતુ બેંકમાં જ જોઈન્ટ કસ્ટોડિયનની ફરજ બજાવતો કર્મચારી છે.
પ્રાપ્ત માહિતી અનુસાર, હરમસિદ્ધ અર્જુનભાઈ કડીયારા નામના આ જોઈન્ટ કસ્ટોડિયને પોતાના હોદ્દાનો દુરુપયોગ કરી આખી ઘટનાને અંજામ આપ્યો હતો. તેણે 6 જાન્યુઆરી 2026 થી 13 મે 2026 સુધીના સમયગાળામાં ધીમે-ધીમે રોકડની ઉચાપત કરી હતી. પોલીસની સઘન તપાસમાં ખૂલ્યું છે કે, આરોપીએ ‘ઇ-કુબેર કરન્સી ચેસ્ટ’ પોર્ટલ પર બોગસ ચેસ્ટ બેલેન્સ સર્ટિફિકેટ અને ખોટી સ્લિપ અપલોડ કરીને બેંકના હિસાબોમાં મોટી ગેરરીતિ આચરી હતી.
આ હાઈપ્રોફાઈલ કેસની ગંભીરતાને જોતા અમદાવાદ શહેર પોલીસના ઉચ્ચ અધિકારીઓએ ઝોન-3 LCB સ્ક્વોડને તપાસ સોંપી હતી. દરમિયાન, ચોક્કસ બાતમીના આધારે પોલીસે 22 મે 2026 ના રોજ અમદાવાદના સોલા વિસ્તારમાં આવેલા એનએફસી રોડ સ્થિત એવરેસ્ટ એન્ક્લેવ ખાતેથી મુખ્ય આરોપી હરમસિદ્ધની ધરપકડ કરી લીધી હતી.
પોલીસની કડક પૂછપરછમાં આરોપી ભાંગી પડ્યો હતો અને તેણે ચોરેલી રકમમાંથી મોટો હિસ્સો પોતાની કારમાં છુપાવ્યો હોવાની કબૂલાત કરી હતી. પંચોને સાથે રાખીને પોલીસે કારની તલાશી લેતા તેમાંથી ₹2.20 કરોડ રોકડા મળી આવ્યા હતા. આ રોકડ ઉપરાંત એક કાર અને ત્રણ મોબાઈલ ફોન સહિત પોલીસે કુલ ₹2.26 કરોડથી વધુનો મુદ્દામાલ જપ્ત કરી લીધો છે.
આ ષડયંત્રમાં હરમસિદ્ધ એકલો ન હતો. તેણે બેંકમાં લોડિંગ-અનલોડિંગની કામગીરી કરતા જુલ્ફીકાર અન્સારી અને સુલતાન અન્સારી નામના બે શખ્સોને પણ પોતાની સાથે ભેળવી લીધા હતા. આ ત્રિપુટીએ સ્ટોર રૂમમાંથી 500 રૂપિયાની નોટોના બંડલ કાઢીને અન્ય પેટીઓમાં ગોઠવી દીધા હતા. ત્યારબાદ આ પેટીઓ ટ્રોલી મારફતે બેંકની બહાર કાઢવામાં આવી હતી.
સૂત્રોના જણાવ્યા અનુસાર, ₹500ની નોટો ભરેલી ત્રણ પેટીઓમાંથી બે પેટી મુખ્ય આરોપીએ પોતાના ઘરે સંતાડી હતી અને એક પેટી તેના સાગરિતો પોતાની સાથે લઈ ગયા હતા. આ સમગ્ર કૌભાંડનો આંકડો 8 થી 9 કરોડ સુધી પહોંચે તેવી શક્યતા છે.
હાલ પોલીસે મુખ્ય આરોપીના રિમાન્ડ મેળવી ફરાર અન્ય આરોપીઓને પકડવા અને બાકીની રકમ રિકવર કરવા તપાસના ચક્રો ગતિમાન કર્યા છે. આ ઘટનાએ બેંકની આંતરિક સુરક્ષા અને મોનિટરિંગ સિસ્ટમ પર પણ ગંભીર સવાલો ઊભા કર્યા છે, જે દિશામાં પણ હવે ઝીણવટભરી તપાસ શરૂ કરાઈ છે.
