અમદાવાદ : શહેરના સરદાર વલ્લભભાઈ પટેલ ઇન્ટરનેશનલ એરપોર્ટ પર ડ્રગ્સની દાણચોરીનો એક મોટો પર્દાફાશ થયો છે. કસ્ટમ્સ વિભાગના એર ઇન્ટેલિજન્સ યુનિટ (AIU) એ બેંગકોક (થાઈલેન્ડ) થી આવેલા એક મુસાફર પાસેથી 10.911 કિલોગ્રામ હાઈડ્રોપોનિક ગાંજો (Hydroponic Weed) જપ્ત કર્યો છે. આ સમગ્ર ઓપરેશનમાં કસ્ટમ્સ વિભાગના ટ્રેઇન્ડ ‘સ્નિફર ડોગ’ (Sniffer Dog) ની ભૂમિકા અત્યંત મહત્વની રહી હતી, જેની સતર્કતાના કારણે કરોડો રૂપિયાનો આ માલ ગુજરાતમાં ઘૂસતા પકડાઈ ગયો છે.
સ્નિફર ડોગે કર્યો ઈશારો અને ફૂટ્યો ભાંડો
મળતી માહિતી અનુસાર, રૂટિન ચેકિંગ દરમિયાન જ્યારે કન્વેયર બેલ્ટ પરથી મુસાફરોનો સામાન પસાર થઈ રહ્યો હતો, ત્યારે ત્યાં હાજર સ્નિફર ડોગે એક ચોક્કસ ટ્રોલી બેગ પાસે જઈને શંકાસ્પદ હલચલ (માર્કિંગ) કરી હતી.
ડોગનો ઈશારો મળતાં જ કસ્ટમ્સ અધિકારીઓએ સતર્ક થઈને તે બેગના માલિકને રોક્યો હતો. બેગનું એક્સ-રે અને મેન્યુઅલ ચેકિંગ કરવામાં આવતા, અંદરથી કપડાંની વચ્ચે ખૂબ જ ચાલાકીથી સંતાડવામાં આવેલા 5 સિલ્વર કલરના વેક્યૂમ-સીલ્ડ પેકેટ મળી આવ્યા હતા. આ પેકેટો ખોલતા તેમાંથી તીવ્ર ગંધ મારતો હાઈડ્રોપોનિક ગાંજો મળી આવ્યો હતો.
સામાન્ય ગાંજા કરતાં 10 ગણો મોંઘો હોય છે ‘હાઈડ્રોપોનિક’
ઉલ્લેખનીય છે કે, હાઈડ્રોપોનિક ગાંજો એ જમીન વિના, બંધ ઓરડામાં ખાસ કૃત્રિમ લાઈટ અને પાણીના માધ્યમથી ઉગાડવામાં આવે છે. તેમાં નશાનું પ્રમાણ (THC) ઘણું ઊંચું હોવાથી તે સામાન્ય ગાંજા કરતાં બજારમાં દસ ગણી વધુ કિંમતે વેચાય છે. થાઇલેન્ડમાં ગાંજાના ઉપયોગને કાયદેસરની માન્યતા મળ્યા બાદ, છેલ્લા કેટલાક સમયથી બેંગકોકથી ગુજરાત અને ભારતમાં આ હાઈડ્રોપોનિક ગાંજાની દાણચોરીના બનાવોમાં નોંધપાત્ર વધારો થયો છે.
સ્થાનિક પેડલર્સ સુધી પહોંચવા કવાયત શરૂ
કસ્ટમ્સ વિભાગે ડ્રગ્સ ટેસ્ટિંગ કીટ દ્વારા પ્રાથમિક તપાસ કર્યા બાદ, NDPS એક્ટ હેઠળ આ ડ્રગ્સ જપ્ત કરી લીધું છે અને આરોપી મુસાફરની સત્તાવાર ધરપકડ કરી છે. હાલમાં એર ઇન્ટેલિજન્સ યુનિટ (AIU) દ્વારા આરોપીના મોબાઈલ ફોનની કોલ ડિટેઈલ્સ અને ચેટ્સના આધારે તપાસ શરૂ કરવામાં આવી છે. આ કરોડો રૂપિયાનો ડ્રગ્સનો જથ્થો અમદાવાદ કે ગુજરાતમાં કયા લોકલ પેડલર્સ કે સિન્ડિકેટને ડિલિવર કરવાનો હતો, તે દિશામાં તપાસના ચક્રો ગતિમાન કરાયા છે.
આ પણ વાંચો – ‘આરોપીને હેરાન ન કરવા 25 હજાર આપો’: 10 હજારમાં સેટીંગ કરનાર વડોદરાના મહિલા PSI ભરાયા, લાંચ લેતો વહીવટદાર પકડાયો
