વડોદરા: ગુજરાત પોલીસની છબીને ખરડાવતો વધુ એક લાંચનો કિસ્સો વડોદરા શહેરમાંથી સામે આવ્યો છે. વડોદરાના માંજલપુર પોલીસ સ્ટેશનમાં નોંધાયેલા મારામારીના એક કેસમાં આરોપીને હેરાન ન કરવા અને જામીનની પ્રક્રિયા ઝડપથી પતાવી દેવા માટે મહિલા પીએસઆઇ (PSI) દ્વારા લાંચની માંગણી કરવામાં આવી હતી. આ કેસમાં એન્ટી કરપ્શન બ્યૂરો (ACB) એ છટકું ગોઠવીને પોલીસ સ્ટેશનના વહીવટદાર એએસઆઇ (ASI) ને રૂ. 10,000 ની લાંચ સ્વીકારતા રંગેહાથ ઝડપી પાડ્યો છે, જ્યારે મુખ્ય આરોપી મહિલા પીએસઆઇ ફરાર થઈ ગયા છે.
શું હતો સમગ્ર મામલો?
લાંચ રુશ્વત વિરોધી બ્યૂરો (ACB) ના જણાવ્યા અનુસાર
ગત 1 જૂનના રોજ માંજલપુર પોલીસ સ્ટેશનમાં અસામાજિક પ્રવૃત્તિ અને મારામારી અંગેનો એક ગુનો નોંધાયો હતો.
આ કેસની તપાસ મહિલા પીએસઆઇ મલ્લિકા ખીમજીભાઇ પરમાર (રહે. કેવલકૃપા સોસાયટી, માંજલપુર) કરી રહ્યા હતાં.
તપાસ દરમિયાન આરોપીને હેરાન ન કરવા અને તે પોલીસ સ્ટેશનમાં હાજર થાય ત્યારે જામીનની કાર્યવાહી ઝડપથી પૂરી કરવા માટે PSI મલ્લિકા પરમારે રૂ. 25,000 ની લાંચ માંગી હતી.
રકઝકના અંતે લાંચની રકમ રૂ. 10,000 નક્કી કરવામાં આવી હતી.
પોલીસ સ્ટેશન બહાર કારમાં સ્વીકારી લાંચ
લાંચની રકમ નક્કી થયા બાદ મહિલા PSI એ આરોપીને આ રકમ માંજલપુર પોલીસ સ્ટેશનના વહીવટદાર અને ASI જયકિશન સામોજી ગામેતી (મૂળ રહે. વિજયનગર, સાબરકાંઠા) ને આપી દેવા જણાવ્યું હતું. પરંતુ, આરોપી લાંચ આપવા માંગતો ન હોવાથી તેણે ACB નો સંપર્ક કર્યો હતો.
ફરિયાદના આધારે ACB એ શનિવારે બપોરે છટકું ગોઠવ્યું હતું. ફરિયાદી લાંચ આપવા પોલીસ સ્ટેશન પહોંચ્યો ત્યારે ASI જયકિશને તેને પોલીસ સ્ટેશનની સામે રોડ પર પાર્ક કરેલી પોતાની ખાનગી કારમાં બેસાડ્યો હતો. ASI એ લાંચની રકમ કારના ડેશબોર્ડ પર મૂકવા જણાવ્યું હતું. જેવી ફરિયાદીએ રકમ મૂકીને બહાર નીકળી ઇશારો કર્યો, કે તરત જ ACB ની ટીમે ત્રાટકીને ASI જયકિશન ગામેતીને રંગેહાથ ઝડપી પાડ્યો હતો.
મહિલા PSI ની શોધખોળ શરૂ
આ ટ્રેપ સફળ થતાં જ ACB એ લાંચની રકમ કબજે કરી ASI ની અટકાયત કરી છે. બીજી તરફ, આ કેસના મુખ્ય આરોપી મહિલા પીએસઆઇ મલ્લિકા પરમાર હાલ ફરાર છે. ACB એ ભ્રષ્ટાચાર નિવારણ અધિનિયમ હેઠળ મહિલા PSI અને ASI બંને સામે ગુનો દાખલ કરી કાયદેસરની કાર્યવાહી અને ફરાર મહિલા અધિકારીની શોધખોળ હાથ ધરી છે.
આ પણ વાંચો – જેતપરના ખેડૂતોએ સરકારનું આમંત્રણ ફગાવ્યું, સ્પષ્ટ કહ્યું- “લેખિતમાં ખાતરી આપો તો જ વાટાઘાટો કરીશું”
