એક્સક્લૂઝિવ રિપોર્ટ : અમદાવાદ ક્રાઈમ બ્રાન્ચે નકલી ચલણી નોટોના એક મોટા રેકેટનો પર્દાફાશ કરતાં ₹2.10 કરોડથી વધુના નકલી નોટો સાથે 6 આરોપીઓને ઝડપી પાડ્યા છે. પ્રાથમિક માહિતી મુજબ, ઝડપાયેલા આરોપીઓ નકલી નોટોની ડિલિવરી આપવા નીકળ્યા હતા, ત્યારે ક્રાઈમ બ્રાન્ચે ટ્રેપ ગોઠવીને તેમને ઝડપી પાડ્યા હતા.
કાર્યવાહી દરમિયાન પોલીસે નકલી નોટોથી ભરેલી ફૉર્ચ્યુનર કાર પણ જપ્ત કરી છે. ચોંકાવનારી વાત એ છે કે આ ગાડી પર VIP ટેગ લગાવવામાં આવ્યો હતો અને નંબર પ્લેટ સાથે “શ્રી સત્યમ યુગ ફાઉન્ડેશન”નો બોર્ડ લગાવવામાં આવ્યો હતો. આરોપીઓ દ્વારા આ ફાઉન્ડેશન આયુષ મંત્રાલયથી માન્યતા પ્રાપ્ત હોવાનું દાવો કરવામાં આવી રહ્યો હતો.
સૂત્રોના જણાવ્યા મુજબ, ઝડપાયેલા તમામ 6 આરોપીઓ સુરતના રહેવાસી છે અને “સત્યમ યુગ ફાઉન્ડેશન” પણ સુરત આધારિત હોવાનું સામે આવ્યું છે. તપાસમાં એવું પણ ખુલ્યું છે કે આશ્રમના વિસ્તરણ માટે નકલી નોટોના કારોબારનો સહારો લેવામાં આવી રહ્યો હતો.
આ કેસનો સૌથી ગંભીર પાસો એ છે કે જપ્ત કરાયેલા નકલી નોટોની ગુણવત્તા અત્યંત ઉચ્ચ સ્તરની છે. સૂત્રોના જણાવ્યા મુજબ, આ નોટોને પાણીમાં ભીંજવ્યા બાદ પણ તે અસલી નોટ જેવી જ લાગતી હતી, જે સામાન્ય નકલી નોટોથી બહુ જ અલગ છે.
તપાસમાં વધુ એક ચોંકાવનારી માહિતી સામે આવી છે કે આ નોટો બનાવવા માટેનો ખાસ કાગળ અને પ્રિન્ટિંગ માટેના ઉપકરણો ચીનમાંથી મંગાવવામાં આવ્યા હતા. અત્યાર સુધી ભારતમાં ઝડપાયેલા નકલી નોટોના કેસોમાં આ નોટોની પ્રિન્ટિંગ અને ગુણવત્તા સૌથી વધુ અદ્યતન ગણાઈ રહી છે.
ક્રાઈમ બ્રાન્ચે સમગ્ર નેટવર્કને ઊંડાણથી ખંગાળવાની કાર્યવાહી શરૂ કરી છે અને આ રેકેટ પાછળ વધુ લોકો સંકળાયેલા હોવાની શક્યતા વ્યક્ત કરી છે.
આ પણ વાંચો- રાધનપુર-ભાભરમાં પ્રેમલગ્નનો વિવાદ : ચૌધરી સમાજનું મહાસંમેલન એકાએક હિંસક બની ગયું
