અભિષેક પાંડેય, અમદાવાદ: દેશના સેમિકન્ડક્ટર ક્ષેત્ર સાથે જોડાયેલા અત્યંત સંવેદનશીલ ચોરીનો બનાવ સામે આવ્યો છે. અમદાવાદ ગ્રામ્યના બોપલ પોલીસ સ્ટેશનમાં મહત્વપૂર્ણ ટેકનિકલ હાર્ડવેરની ચોરી અંગે ફરિયાદ નોંધાઈ છે. દેશ માટે અત્યંત મહત્ત્વની અમદાવાદ સ્થિત માઇક્રોન કંપનીમાં ગંભીર ચોરીની ઘટના બની હોવાનું સામે આવ્યું છે. આ ચોરીના તાર ઉત્તર પ્રદેશના નોઇડા તેમજ કર્ણાટકના બેંગલુરુ સુધી પહોંચતા હોવાનું જાણવા મળ્યું છે.
સૂત્રોના જણાવ્યા મુજબ, અમદાવાદના બોપલ પોલીસ મથકની હદમાં આવેલી માઇક્રોન ટેકનોલોજીમાં RAM ચિપ સાથે સંબંધિત ટેકનિકલ હાર્ડવેરની ગંભીર ચોરી થઈ છે. જે અંગે બોપલ પોલીસ સ્ટેશનમાં ફરિયાદ નોંધાવવામાં આવી છે.
કેસના મુખ્ય આરોપી મનીષ શર્માની ધરપકડ કરવામાં આવી છે. છેલ્લા એક અઠવાડિયામાં બોપલ પોલીસની લોકલ ક્રાઇમ બ્રાન્ચ (LCB) દ્વારા અંદાજે 9 લોકોને પૂછપરછ માટે કસ્ટડીમાં લેવામાં આવ્યા છે.
પ્રાથમિક માહિતી મુજબ, આરોપી મનીષ શર્માએ કંપનીમાંથી RAM ચિપ સાથે સંબંધિત ટેકનિકલ હાર્ડવેર અને તેની ડિઝાઇનની ચોરી કરી હતી. ત્યારબાદ તેણે આ સંવેદનશીલ ટેકનિકલ સામગ્રી નોઇડાના વિશાલ અને આસિફ નામના બે વ્યક્તિઓને વેચી દીધી હોવાનો આરોપ છે. તપાસ દરમિયાન એવું પણ સામે આવ્યું છે કે વિશાલ અને આસિફે આ હાર્ડવેર અન્ય કેટલાક લોકો સુધી પહોંચાડ્યું હતું. જેના કારણે સમગ્ર નેટવર્કના અનેક સ્તરો હોવાની આશંકા વ્યક્ત કરવામાં આવી રહી છે.
સૂત્રોના જણાવ્યા મુજબ, હવે પોલીસ એ દિશામાં તપાસ કરી રહી છે કે ચોરાયેલા હાર્ડવેર અને તેની ટેકનિકલ ડિઝાઇનનો ઉપયોગ ક્યાં-ક્યાં કરવામાં આવ્યો, તે કેટલા લોકો સુધી પહોંચી અને તેના કારણે દેશના ટેકનિકલ અથવા આર્થિક હિતોને કેટલું નુકસાન થઈ શકે છે.
આ સમગ્ર કેસની ગંભીરતાને ધ્યાનમાં રાખીને અમદાવાદ ગ્રામ્યના પોલીસ અધિક્ષક ઓમ પ્રકાશ જાટ પોતે તપાસની દેખરેખ અને સુપરવિઝન કરી રહ્યા છે. પોલીસની અલગ-અલગ ટીમો કેસના વિવિધ પાસાઓની તપાસમાં વ્યસ્ત છે. કસ્ટડીમાં લેવામાં આવેલા લોકોની પૂછપરછ ચાલી રહી છે તેમજ ડિજિટલ પુરાવાઓની પણ વિગતવાર તપાસ કરવામાં આવી રહી છે.
સૂત્રોના જણાવ્યા મુજબ, આગામી દિવસોમાં આ કેસમાં વધુ કેટલીક ધરપકડ થવાની શક્યતા છે. પોલીસ ડિજિટલ પુરાવા, ઇલેક્ટ્રોનિક ઉપકરણો અને નાણાકીય લેવડદેવડની પણ તપાસ કરી રહી છે, જેથી સ્પષ્ટ થઈ શકે કે આ કથિત ચોરી પાછળ માત્ર આર્થિક લાભનો હેતુ હતો કે પછી તેની પાછળ કોઈ મોટું સંગઠિત ષડયંત્ર કાર્યરત હતું.
ઉલ્લેખનીય છે કે માઇક્રોન ટેકનોલોજી હાલમાં દેશ માટે અત્યંત મહત્વપૂર્ણ કંપની છે. કંપનીના મહત્વનો અંદાજ એ વાત પરથી લગાવી શકાય છે કે તેની દરેક મહત્વપૂર્ણ બાબત પર વડાપ્રધાન કાર્યાલય (PMO) પોતે નજર રાખી રહ્યું છે. આશરે ચાર મહિના પહેલાં વડાપ્રધાને માઇક્રોનની ફેસિલિટીની મુલાકાત લીધી હતી અને તેમની આગામી મુલાકાતની તૈયારીઓ પણ અંતિમ તબક્કામાં હોવાનું જાણવા મળે છે.
નોંધ: આ સમાચાર પ્રાથમિક તપાસ અને સૂત્રો પાસેથી પ્રાપ્ત માહિતીના આધારે તૈયાર કરવામાં આવ્યા છે. સમગ્ર મામલે માઇક્રોન ટેકનોલોજી અને પોલીસનું સત્તાવાર નિવેદન તેમજ વિગતવાર પુષ્ટિ આવવાની બાકી છે.
આ પણ વાંચો – ડ્રગ્સ નેટવર્ક પર ગુજરાત એક્સક્લૂસિવ ભાગ-1 : અમદાવાદમાં કયા ડ્રગ્સનું સૌથી વધુ ચલણ?
