- અમદાવાદ ડ્રગ્સ મેગા ઇન્વેસ્ટિગેશન- ભાગ 2: માત્ર 20% બહારથી, બાકીનું MDMA ગુજરાતમાં જ થાય છે તૈયાર! દરરોજ 5 કરોડનો કાળો કારોબાર
- બાળકોને કફ સિરપના રવાડે ચઢાવનાર ‘તિવારીજી’ કોણ? વાંચો ગુજરાતમાં MDMA અને કોરેક્સના મોટા સપ્લાય નેટવર્કનો સનસનીખેજ પર્દાફાશ
અભિષેક પાંડેય, અમદાવાદ: ગુજરાત એક્સક્લૂસિવની વિશેષ તપાસ શ્રેણીના પ્રથમ ભાગમાં અમે ખુલાસો કર્યો હતો કે અમદાવાદમાં સૌથી વધુ ચલણ ગાંજાનું છે. ત્યારબાદ MDMA (એમડી), કોડીનયુક્ત કફ સિરપનો દુરુપયોગ અને ચરસનો ક્રમ આવે છે. જ્યારે હેરોઇન, કોકેન અને અન્ય હાઈ-ક્વોલિટી સિન્થેટિક ડ્રગ્સનું સેવન હજુ પણ મર્યાદિત વર્ગ સુધી સીમિત છે.
હવે સૌથી મોટો પ્રશ્ન એ છે કે આખરે આ ડ્રગ્સ અમદાવાદ સુધી પહોંચે છે ક્યાંથી?
હેરોઇન અને કોકેન વિદેશથી, પરંતુ સૌથી વધુ વપરાતા ડ્રગ્સ દેશમાંથી
ગુજરાત એક્સક્લૂસિવની તપાસ મુજબ હેરોઇન, કોકેન અને કેટલાક અન્ય ઉચ્ચ ગુણવત્તાવાળા સિન્થેટિક ડ્રગ્સ મુખ્યત્વે મુંબઈ, નેપાળ, નાગાલેન્ડ અને દરિયાઈ માર્ગે ગુજરાત સુધી પહોંચે છે. આ ડ્રગ્સનું ઉત્પાદન મોટા ભાગે વિદેશમાં થતું હોવાનું સૂત્રો જણાવે છે.
પરંતુ અમદાવાદમાં સૌથી વધુ વપરાશ ધરાવતા ડ્રગ્સનું ચિત્ર સંપૂર્ણપણે અલગ છે.
ગાંજો મુખ્યત્વે ઓડિશા, છત્તીસગઢ, પશ્ચિમ બંગાળ, ઉત્તર-પૂર્વીય રાજ્યો, આંધ્ર પ્રદેશ, તેલંગાણા, રાજસ્થાન, ઉત્તર પ્રદેશ, ઉત્તરાખંડ અને કર્ણાટક સહિતના વિવિધ રાજ્યોમાંથી ગુજરાત અને ત્યારબાદ અમદાવાદ સુધી પહોંચે છે.
અમદાવાદમાં વપરાતું મોટાભાગનું MDMA ગુજરાતમાં જ તૈયાર થાય છે
ગુજરાત એક્સક્લૂસિવની તપાસમાં સામે આવેલા સૌથી ચોંકાવનારા તથ્યોમાંનું એક એ છે કે અમદાવાદમાં વપરાતા MDMAનો મોટો હિસ્સો બહારથી આવતો નથી.
સૂત્રોના દાવા મુજબ મહારાષ્ટ્રમાંથી અંદાજે માત્ર 5 ટકા જેટલું MDMA આવે છે, જ્યારે રાજસ્થાન અને મધ્ય પ્રદેશમાંથી મળીને આશરે 15થી 20 ટકા સપ્લાય થાય છે.
મધ્ય પ્રદેશમાં મંદસૌર, નીમચ, મલ્હારગઢ, ભાટખેડા અને નાહરગઢ, જ્યારે રાજસ્થાનમાં પ્રતાપગઢ, ચિત્તોડગઢ, નાગૌર અને બિકાનેર MDMA સપ્લાયના મહત્વના કેન્દ્રો તરીકે ઓળખાય છે.
પરંતુ તપાસ મુજબ અમદાવાદમાં વપરાતા કુલ MDMAમાંથી માત્ર 20થી 25 ટકા જ બહારના રાજ્યોમાંથી આવે છે, જ્યારે 70 ટકાથી વધુ MDMA ગુજરાતમાં જ તૈયાર થઈ રહ્યું હોવાનું સૂત્રોનો દાવો છે.
આ પણ વાંચો – ડ્રગ્સ વિરુદ્ધ સાયક્લોથોનથી આગળ વધવાની જરૂર છે, આખરે ગુજરાતમાં નશાનો કારોબાર કેમ નથી અટકતો?
શું તપાસ એજન્સીઓની નજર ખોટી દિશામાં?
ડ્રગ્સ નેટવર્ક વિશે જાણકાર સૂત્રોના જણાવ્યા મુજબ કાયદા અમલવારી એજન્સીઓનું મુખ્ય ધ્યાન રાજ્યની સરહદો પરથી આવતી સપ્લાય પર કેન્દ્રિત છે, જ્યારે સૌથી મોટું ઉત્પાદન અને વિતરણનું નેટવર્ક રાજ્યની અંદર જ કાર્યરત છે.
સૂત્રો એવો પણ દાવો કરે છે કે કેટલાક મોટા ડિસ્ટ્રિબ્યુટર હવે એટલા ચાલાક બની ગયા છે કે તેઓ બહારના રાજ્યોમાંથી મર્યાદિત માત્રામાં માલ મંગાવી તેને જાણબૂઝીને પોલીસના હાથે પકડાવા દે છે, જેથી તપાસ એજન્સીઓનું ધ્યાન ગુજરાતમાં ચાલી રહેલા મોટા ઉત્પાદન નેટવર્કથી દૂર રહે. રાજ્યની અંદર ચાલી રહેલા આ મૂળ નેટવર્ક સુધી તપાસ પહોંચવી સૌથી મોટો પડકાર હોવાનું પણ સૂત્રોનું માનવું છે.
સૂત્રોના અંદાજ મુજબ માત્ર અમદાવાદ શહેરમાં જ MDMAનો દૈનિક વેપાર અંદાજે 4થી 5 કરોડ રૂપિયા સુધી પહોંચી ગયો છે.
કફ સિરપનો આખો ખેલ ગુજરાતમાં?
ગુજરાત એક્સક્લૂસિવની તપાસ મુજબ કફ સિરપના ગેરકાયદે નેટવર્કનું કેન્દ્ર પણ ગુજરાત જ હોવાનું સામે આવ્યું છે.
સૂત્રોના જણાવ્યા મુજબ અમદાવાદમાં વેચાતું કફ સિરપ ગુજરાતમાં જ તૈયાર થાય છે, અમદાવાદના નેટવર્ક દ્વારા જ તેનું વિતરણ થાય છે અને તેનો સૌથી મોટો ભોગ પણ અમદાવાદના બાળકો અને કિશોરો બની રહ્યા છે.
તપાસ દરમિયાન સામે આવેલી માહિતી મુજબ આ સમગ્ર નેટવર્કની કડીઓ ઉત્તર પ્રદેશના પૂર્વાંચલ વિસ્તાર સુધી પહોંચે છે. સૂત્રો જણાવે છે કે પૂર્વાંચલના એક પ્રભાવશાળી બાહુબલી, જેને ડ્રગ્સ વર્તુળોમાં “કોડીન ભૈયા” તરીકે ઓળખવામાં આવે છે, તેમની સુધી આ નેટવર્કના તાર જોડાયેલા છે.
સૂત્રોના જણાવ્યા મુજબ ગયા ડિસેમ્બર-જાન્યુઆરી દરમિયાન કફ સિરપના નશાથી સેંકડો બાળકોના મોત બાદ આ નામ ચર્ચામાં આવ્યું હતું. ઉત્તર પ્રદેશ એસટીએફે તેમની સામે કાર્યવાહી શરૂ કરી હતી, પરંતુ તેઓ પોતાના રાજકીય સમીકરણોના કારણે કાયદાકીય કાર્યવાહીમાંથી બચી ગયા હતા. સૂત્રોના જણાવ્યા મુજબ એ જ “કોડીન ભૈયા”ની શહેરના પૂર્વ વિસ્તારમાં સક્રિય એક “તિવારીજી” પર વિશેષ કૃપા છે અને કફ સિરપના નેટવર્કનું કેન્દ્ર પણ આ જ “તિવારીજી” હોવાનું કહેવાય છે.
અમદાવાદમાં ‘તિવારીજી’ એટલે કોડીન ભૈયા
ગુજરાત એક્સક્લૂસિવને મળેલી માહિતી મુજબ અમદાવાદના પૂર્વ વિસ્તારમાં કાર્યરત ફાર્મા ક્ષેત્ર સાથે સંકળાયેલા એક “તિવારીજી”ને કફ સિરપ સપ્લાય નેટવર્કના મુખ્ય સંચાલક તરીકે ઓળખવામાં આવે છે.
સૂત્રોના દાવા મુજબ તેમના નેટવર્ક મારફતે દરરોજ અંદાજે 30 હજાર જેટલી કફ સિરપની બોટલો ડબલ ભાવે અમદાવાદના બજારમાં પહોંચાડવામાં આવે છે. ત્યારબાદ આ જ બોટલો ત્રણથી પાંચ ગણા ઊંચા ભાવે નશા માટે વેચાય છે અને હજારો કિશોરો તથા યુવાનો તેના વ્યસનની ચપેટમાં આવી રહ્યા છે.
તપાસ માત્ર મેડિકલ સ્ટોર સુધી જ સીમિત
હાલ કાયદા અમલવારી એજન્સીઓ કફ સિરપના કેસોમાં મોટા ભાગે મેડિકલ સ્ટોરો સામે કાર્યવાહી કરી રહી છે. પરંતુ જો સપ્લાય ચેઇનના મૂળ સુધી પહોંચવામાં નહીં આવે, તો માત્ર રિટેલ સ્તરે કાર્યવાહી કરીને શહેરના બાળકો અને કિશોરોને આ વ્યસનમાંથી બચાવવા મુશ્કેલ બનશે.
આ પણ વાંચો – ડ્રગ્સ નેટવર્ક પર ગુજરાત એક્સક્લૂસિવ ભાગ-1 : અમદાવાદમાં કયા ડ્રગ્સનું સૌથી વધુ ચલણ?
