ગુજરાતમાં દારૂબંધીના કડક અમલ વચ્ચે સ્ટેટ મોનિટરિંગ સેલે અમરેલી જિલ્લાના લાઠી તાલુકાના દામનગરમાં વિદેશી દારૂના ગેરકાયદેસર નેટવર્કનો પર્દાફાશ કર્યો છે. સહજાનંદ ગુરુકુળ પાસે આવેલા એક ગોડાઉનમાં પોલીસે અચાનક દરોડો પાડીને ૭,૬૮૬ બોટલ વિદેશી દારૂ જપ્ત કર્યો છે. આ માલની કુલ કિંમત આશરે રૂપિયા ૧૬.૯૧ લાખ છે, જ્યારે સમગ્ર મુદ્દામાલની કિંમત રૂપિયા ૫૭.૮૯ લાખની આસપાસ છે.
પી.આઈ. આર.કે. કરમટાની ટીમને બાતમી મળી હતી કે દામનગરમાં વિદેશી દારૂનો મોટો જથ્થો ઉતારવામાં આવી રહ્યો છે. દરોડો પાડતાં આંધ્રપ્રદેશ, ઉત્તરપ્રદેશ અને ગોવાની બનાવટના વિદેશી દારૂના કાર્ટનો મળી આવ્યા. સ્થળ પરથી પોલીસે ૪ ટ્રક, કાર અને બાઈક (કુલ કિંમત ₹૪૦.૪૦ લાખ), ૭ મોબાઈલ (₹૫૫,૦૦૦) અને રોકડ ₹૩,૨૪૦ પણ જપ્ત કર્યા છે.
દરોડા દરમિયાન પોલીસે ૬ આરોપીઓને રંગેહાથ ઝડપી પાડ્યા છે
કૌશિક ઉર્ફે કવો ભરતભાઈ ગોહિલ (દામનગર)
વિષ્ણુપરી હિંમતપરી ગોસ્વામી (દામનગર)
સિકંદર ઉર્ફે ભાભા કલુભાઈ પઠાણ (બોટાદ)
જયેશ જગજીવન જાદવ (બોટાદ)
હરિહર ઉર્ફે હરિ ભટ્ટ (ટ્રક ડ્રાઈવર, અમદાવાદ)
સ્વરૂપ ઉર્ફે ચિન્ટુ ગાવિત (ટ્રક ક્લીનર, મહારાષ્ટ્ર)
આ ઉપરાંત સપ્લાયર અને અન્ય ૬ શખ્સોને વોન્ટેડ જાહેર કરવામાં આવ્યા છે.
દામનગર પોલીસે પ્રોહિબિશન એક્ટની વિવિધ કલમો હેઠળ ગુનો નોંધીને આગળની તપાસ શરૂ કરી છે. આ દરોડાથી સ્થાનિક પોલીસની કામગીરી અંગે પણ સવાલો ઊભા થયા છે કે આટલો મોટો જથ્થો કેવી રીતે તેમની આંખો સામે આવી શક્યો.આ કાર્યવાહીને લઈને સ્થાનિક સ્તરે ચર્ચા ગરમાઈ છે અને દારૂબંધીના કડક અમલને લઈને સરકારની તૈયારીઓનું પણ પરીક્ષણ થઈ રહ્યું છે.
આ પણ વાંચો – મરઘી ઇકબાલની હત્યા : ડીઝલથી લાશ સળગાવનારા ત્રણ આરોપી પોલીસના હાથે ઝબ્બે
