ગુજરાતમાં ગોલ્ડ લોનનો નવો રેકોર્ડ : આર્થિક ભીંસમાં નાગરિકોએ ગિરવે મૂક્યું રૂ. ૨૩,૩૮૧ કરોડનું સોનું!

અમદાવાદ : ગુજરાતમાં નાણાકીય કટોકટી અને આકસ્મિક જરૂરિયાતોને પહોંચી વળવા માટે સોનું ગિરવે મૂકીને લોન મેળવવાનો ટ્રેન્ડ ઐતિહાસિક સપાટીએ પહોંચ્યો છે. તાજેતરના નાણાકીય આંકડાઓ દર્શાવે છે કે, રાજ્યના નાગરિકોએ વિવિધ બેંકો અને નોન-બેંકિંગ ફાયનાન્સ કંપનીઓ (NBFC) માં અંદાજે રૂ. ૨૩,૩૮૧ કરોડ ની કિંમતનું સોનું ગિરવે મૂકીને રેકોર્ડબ્રેક ગોલ્ડ લોન મેળવી છે.

ગોલ્ડ લોન તરફ વળવાના મુખ્ય કારણો

આર્થિક ભીંસ : વ્યાપાર-ધંધામાં રોકડની અછત, વધતી મોંઘવારી, અણધારી તબીબી કટોકટી અને બાળકોના શિક્ષણના તોતિંગ ખર્ચને પહોંચી વળવા મધ્યમ અને ઉચ્ચ-મધ્યમ વર્ગ ગોલ્ડ લોન તરફ વળ્યો છે.

ઝડપી અને સરળ પ્રક્રિયા : અન્ય લોનની સરખામણીએ ગોલ્ડ લોન અત્યંત ઓછા કાગળિયાં (મિનિમમ ડોક્યુમેન્ટેશન) અને ઝડપી પ્રોસેસિંગ સાથે ગણતરીની મિનિટોમાં મળી જાય છે.

ઊંચા ભાવનો ફાયદો : સોનાના આસમાને આંબતા ભાવોને કારણે ગ્રાહકોને પોતાના સોનાના વજન સામે હવે વધુ રકમની લોન આસાનીથી મળી રહી છે.

આકર્ષક વ્યાજદરો: સરકારી અને ખાનગી બેંકો ઉપરાંત NBFCs દ્વારા આક્રમક માર્કેટિંગ અને સ્પર્ધાત્મક વ્યાજદરો ઓફર કરવામાં આવી રહ્યા છે.

લોકોની માનસિકતામાં મોટો બદલાવ

ભૂતકાળમાં સોનું ગિરવે મૂકવું એ સામાજિક રીતે પ્રતિષ્ઠા ઓછી કરનારું કે શરમજનક ગણાતું હતું. પરંતુ હવે સમય અને લોકોની વિચારધારા બદલાયા છે. લોકો હવે સોનાને માત્ર લોકરમાં પડી રહેલી એક ‘નિષ્ક્રિય સંપત્તિ’ ગણવાને બદલે, કટોકટીના સમયમાં તાત્કાલિક રોકડ (લિક્વિડિટી) મેળવવાનું એક અત્યંત સ્માર્ટ અને મજબૂત સાધન માની રહ્યા છે.

ગુજરાતીઓની લોન પસંદગીનો નવો ક્રમ

કેન્દ્રીય નાણાં મંત્રાલયના રિપોર્ટ મુજબ, ધિરાણ વધવા છતાં ગોલ્ડ લોનમાં ડિફોલ્ટરની સંખ્યામાં નોંધપાત્ર ઘટાડો જોવા મળ્યો છે. આ આંકડાઓ સ્પષ્ટ કરે છે કે આર્થિક મુશ્કેલીના સમયે સોનું ગુજરાતીઓ માટે સૌથી મોટો અને ભરોસાપાત્ર આધાર સાબિત થઈ રહ્યું છે, જે દર્શાવે છે કે રાજ્યના અર્થતંત્રમાં ગોલ્ડ લોન માર્કેટ આગામી દિવસોમાં હજુ વધુ મજબૂત બનશે.

આ પણ વાંચો – રામોલ દુષ્કર્મ કેસ : ૧૪ વર્ષની સગીરાને ગોંધી રાખનાર મુખ્ય આરોપી અને મદદગાર ૩ સંબંધીઓને ૨૦ વર્ષની સખત કેદ