વડોદરા: સંસ્કારી નગરી વડોદરાના કુંભારવાડા વિસ્તારમાં એક શ્રમજીવી પરિવારમાં થયેલા ઝઘડાએ ગંભીર અને હિંસક સ્વરૂપ ધારણ કર્યું છે. સામાન્ય બોલાચાલીમાં ઉશ્કેરાયેલી પત્નીએ તેના જ પતિ પર ત્રિકમ વડે હુમલો કરી તેને મોતને ઘાટ ઉતારી દેતા સમગ્ર વિસ્તારમાં ચકચાર મચી ગઈ છે. દારૂના નશા અને ઘરકંકાસે એક જ પળમાં પરિવારની ખુશીઓ છીનવી લીધી છે.
વહેલી સવારે મામલો બિચક્યો
શહેરના કુંભારવાડા તલાવડી વિસ્તારમાં રહેતા અમિત અને મંજુ નામના શ્રમજીવી દંપતી વચ્ચે આજે વહેલી સવારે કોઈ બાબતે ઝઘડો શરૂ થયો હતો. સ્થાનિકોના જણાવ્યા મુજબ, અમિત દારૂ પીવાની આદત ધરાવતો હતો અને પતિ-પત્ની વચ્ચે અવારનવાર બોલાચાલી થતી રહેતી હતી. આજે પણ અમિત નશામાં ધૂત હતો અને ઝઘડો એટલો વધ્યો કે બંને વચ્ચે હાથાપાઈ શરૂ થઈ ગઈ હતી.
આવેશમાં આવી પત્નીએ ત્રિકમ ઝીંકી દીધું
ઝઘડા દરમિયાન આવેશમાં આવી ગયેલી મંજુએ ભાન ગુમાવ્યું હતું અને નજીકમાં પડેલું કામ કરવાનું સાધન ‘ત્રિકમ’ ઉપાડી અમિત પર જોરદાર ફટકો મારી દીધો હતો. ત્રિકમ વાગતાની સાથે જ અમિત લોહીલુહાણ હાલતમાં જમીન પર ઢળી પડ્યો હતો અને ગણતરીની મિનિટોમાં પત્નીની નજર સામે જ તેણે દમ તોડી દીધો હતો.
પતિનું મોત જોઈ પત્ની ભાંગી પડી
ઘટનાની જાણ થતા જ આસપાસના લોકો દોડી આવ્યા હતા અને એમ્બ્યુલન્સને જાણ કરી હતી. જોકે, તપાસ બાદ પેરામેડિકલ સ્ટાફે અમિતને મૃત જાહેર કર્યો હતો. આવેશમાં હત્યા કરી બેસેલી પત્ની મંજુ જ્યારે હોશમાં આવી ત્યારે પતિના મૃતદેહને જોઈને હૈયાફાટ રુદન કરવા લાગી હતી. પોલીસના ઉચ્ચ અધિકારીઓનો કાફલો ઘટનાસ્થળે પહોંચ્યો હતો અને મૃતદેહને પોસ્ટમોર્ટમ માટે ખસેડી મંજુ વિરુદ્ધ હત્યાનો ગુનો નોંધી કાયદેસરની કાર્યવાહી હાથ ધરી છે.
