અમદાવાદ: શહેરના સાબરમતી અને ચાંદખેડા પોલીસ સ્ટેશન વિસ્તારોમાં દારૂના વધતા ગેરકાયદેસર કારોબારને લઈને ગંભીર સવાલો ઊભા થઈ રહ્યા છે. સ્થાનિક સ્તરે એવી ચર્ચાઓ તેજ બની છે કે બંને વિસ્તારોમાં દેશી તેમજ અંગ્રેજી દારૂની ખુલ્લેઆમ ખરીદી-વેચાણ સાથે હોમ ડિલિવરી સુધીની વ્યવસ્થા કાર્યરત છે, છતાં પોલીસ તંત્ર તરફથી અસરકારક કાર્યવાહી થતી દેખાઈ રહી નથી. પરિણામે બુટલેગરો નિર્ભય બની કામગીરી ચલાવી રહ્યા છે.
સાબરમતી પોલીસ સ્ટેશન વિસ્તારમાં વહીવટદાર તરીકે મહેન્દ્રસિંહ ઉર્ફે એમએસનું નામ ચર્ચામાં છે. સૂત્રોના જણાવ્યા મુજબ તેમની મૂળ નિમણૂક જામનગર જિલ્લામાં છે, છતાં અમદાવાદના સાબરમતી વિસ્તારમાં ચાલતા દારૂના ગોઠવાયેલા નેટવર્ક સાથે તેમનું નામ સતત જોડાઈ રહ્યું છે. સ્થાનિક સ્તરે એવી પણ ચર્ચા છે કે વિસ્તારના દારૂ સર્કિટને એક પ્રકારનું “પ્રોટેક્શન કવર” મળતું હોવાથી બુટલેગરો ખુલ્લેઆમ સક્રિય છે.
બીજી તરફ ચાંદખેડા પોલીસ સ્ટેશન વિસ્તારમાં વિશાલ વાઘેલા નામના વહીવટદારનું નામ દારૂના કારોબાર સાથે ચર્ચામાં છે. સ્થાનિક માહિતી મુજબ ચાંદખેડા વિસ્તારના સંચાલન માટે વિશાલ વાઘેલા વતી ડીડી સોલંકી નામનો વ્યક્તિ સેટિંગ અને મેનેજમેન્ટ સંભાળે છે. બંને વિસ્તારમાં સતત એકસરખી મળતી માહિતીઓએ પોલીસ તંત્રની કામગીરી પર ગંભીર પ્રશ્નચિહ્ન ઊભા કર્યા છે.
વિસ્તારના રહેવાસીઓમાં એવો રોષ જોવા મળી રહ્યો છે કે દારૂના અડ્ડા, સપ્લાય પોઇન્ટ અને ડિલિવરી નેટવર્ક અંગે સ્થાનિક સ્તરે ખુલ્લી ચર્ચાઓ થતી હોવા છતાં તંત્ર દ્વારા કડક અને સતત કાર્યવાહી કરવામાં આવતી નથી. દર દિવસે, દરેક સમયે અનેક વિસ્તારોમાં વાહનો મારફતે દારૂની અવરજવર અને હોમ ડિલિવરી થઈ રહ્યો છે.
કાયદો અને વ્યવસ્થા જાળવવાની જવાબદારી ધરાવતા પોલીસ તંત્ર સામે હવે મૂળ સવાલ એ ઊભો થયો છે કે જો દારૂનું નેટવર્ક આટલું સક્રિય અને ગોઠવાયેલું છે, તો સ્થાનિક પોલીસ અને વહીવટી માળખું અજાણ કેવી રીતે હોઇ શકે છે?
આ પણ વાંચો – ક્રૂડ ઓઇલના ભડકે બળતા ભાવ અને સંભવિત અછત: ભારતીય અર્થવ્યવસ્થા પર શું થશે અસર?
