અમદાવાદ : અમદાવાદ શહેરના ઝડપથી વિકસતા હેબતપુર વિસ્તારમાં બની રહેલી ‘બિનોરી એરિસ્ટોલા’ નામની મોટી રહેણાંકીય પ્રોજેક્ટ સાઇટ પર એક દુઃખદ અકસ્માત બન્યો છે. 23 વર્ષીય યુવક અનીલ નિનામા (મૂળ રહેવાસી બાંસવાડા, રાજસ્થાન) ત્રીજા માળે વોટરપ્રૂફિંગનું કામ કરતા હતા ત્યારે પગ લપસી જતાં નીચે પટકાયા હતા. માથામાં ગંભીર ઈજા થતાં ઘટનાસ્થળે જ તેમનું મોત નીપજ્યું હતું.
બોડકદેવ પોલીસે આ દુર્ઘટના અંગે તાત્કાલિક તપાસ શરૂ કરી હતી. પ્રાથમિક તપાસમાં ખુલાસો થયો કે સાઇટ પર સેફ્ટી નેટની એકેય વ્યવસ્થા નહોતી કરવામાં આવી, સાથે જ શ્રમિકને સેફ્ટી બેલ્ટ કે હારનેસ પણ આપવામાં આવ્યો નહોતો. આ બંને મહત્વના સેફ્ટી સાધનોની સંપૂર્ણ ગેરહાજરીને કારણે જ આ દુર્ભાગ્યપૂર્ણ ઘટના બની હોવાનું પોલીસે જણાવ્યું છે.
બોડકદેવ પોલીસે આ મામલે લેબર કોન્ટ્રાક્ટર લક્ષ્મણ મકવાણા, મુખ્ય કોન્ટ્રાક્ટર ચિરાગ પટેલ, વિષ્ણુ શર્મા અને સાઇટ પર કામ કરતા હાર્દિક નામના વ્યક્તિ વિરુદ્ધ બેદરકારી અને શ્રમિક સુરક્ષા નિયમોના ઉલ્લંઘનના આરોપે ગુનો નોંધ્યો છે. પોલીસે આરોપીઓની પૂછપરછ શરૂ કરી છે અને સાઇટના સેફ્ટી રેકોર્ડ, કામની પરિસ્થિતિ, શ્રમિકોના રજિસ્ટર અને કોન્ટ્રાક્ટની શરતોની તપાસ કરી રહી છે.
આ ઘટના ફરી એક વખત શહેરની કન્સ્ટ્રક્શન સાઇટ પર શ્રમિકોની સુરક્ષા અંગે ગંભીર પ્રશ્નો ઉભા કરે છે. શહેરમાં દરરોજ નવા પ્રોજેક્ટ્સ શરૂ થઈ રહ્યા છે, પરંતુ મોટા ભાગની સાઇટ પર સેફ્ટીના મૂળભૂત નિયમોનું પાલન થતું નથી. શ્રમિકોને સેફ્ટી હેલ્મેટ, બેલ્ટ, નેટ, ફૂટવેર અને તાલીમ આપવાની જવાબદારી કોન્ટ્રાક્ટર અને સાઇટ મેનેજમેન્ટની છે, પરંતુ આ કિસ્સામાં આ બધું અવગણવામાં આવ્યું હતું.
આ ઘટના બાદ શ્રમિક સંગઠનો અને સ્થાનિક લોકોએ પણ સાઇટ પર સેફ્ટીના નિયમોના કડક અમલની માંગ ઉઠાવી છે. બોડકદેવ પોલીસે આરોપીઓને કોર્ટમાં રજૂ કરવાની તૈયારી કરી છે અને સાઇટના માલિક અને એન્જિનિયરિંગ વિભાગની પણ તપાસ ચાલુ છે.
આ પણ વાંચો – ગુજરાતમાં LPG સિલિન્ડર સંકટ વચ્ચે રાજ્ય પોલીસ વડાનો કડક સંદેશ: ગેસની સંગ્રહખોરી અને કાળાબજારી સામે એક્શન મોડ
