અમદાવાદના વાસણા વિસ્તારમાં કાયદો અને વ્યવસ્થાને લઈને પ્રશ્ન ઉભા કરતી એક દુ:ખદ હત્યાની ઘટના સામે આવી છે. ગુપ્તાનગર પાસે આવેલા ભરવાડવાસમાં ગત મોડી રાત્રે ઊંઘી રહેલા 25 વર્ષીય યુવક હિતેશની અજાણ્યા શખસે તીક્ષ્ણ હથિયારથી ઘા કરી હત્યા કરી નાખી છે. આ સમગ્ર ઘટના મૃતકની 19 વર્ષીય બહેનની આંખ સામે જ બની હતી.
મૃતક હિતેશ મૂળ રાજસ્થાનના ઉદયપુરનો વતની હતો અને છેલ્લા 20 વર્ષથી વાસણામાં ભાડાના મકાનમાં પરિવાર સાથે રહેતો હતો. તે સાણંદ વિસ્તારમાં એક ફર્નિચર કારખાનામાં કામ કરીને પરિવારનું ગુજરાન ચલાવતો હતો. રાબેતા મુજબ તે પરિવાર સાથે ઘરની બહાર ખુલ્લામાં પલંગ પર સૂતો હતો.
મળતી માહિતી અનુસાર, મોડી રાત્રે આખો પરિવાર ગાઢ નિદ્રામાં હતો ત્યારે અજાણ્યા શખસે હિતેશ પર અચાનક હુમલો કર્યો. મૃતકની 19 વર્ષીય બહેને પોલીસને આપેલી ફરિયાદમાં જણાવ્યું કે, “હિતેશને મારવાનો અવાજ સાંભળી મારી ઊંઘ ઉડી ગઈ. મેં જોયું તો જેકેટ અને માથા પર ટોપી પહેરેલો પાતળો યુવક તેના પેટમાં તીક્ષ્ણ હથિયારથી વારંવાર ઘા કરી રહ્યો હતો. મેં બૂમાબૂમ કરી તો આસપાસના લોકો જાગી ગયા, પરંતુ ત્યાં સુધીમાં હત્યારો અંધારાનો લાભ લઈને ભાગી છૂટ્યો હતો.”
લોહીલુહાણ હાલતમાં હિતેશને 108ની એમ્બ્યુલન્સ દ્વારા હોસ્પિટલ લઈ જવાયો, પરંતુ તબીબોએ તેને મૃત જાહેર કર્યો હતો.
ઘટનાની જાણ થતાં વાસણા પોલીસ સ્થળ પર પહોંચી ગઈ હતી. પ્રાથમિક તપાસમાં પોલીસને શંકા છે કે આ હત્યા પાછળ કોઈ જૂની અદાવત અથવા વ્યક્તિગત વેરભાવ હોઈ શકે છે. પોલીસે મૃતકના પરિવારજનો, પડોશીઓની પૂછપરછ શરૂ કરી છે અને અલગ-અલગ ટીમો બનાવીને તપાસ તેજ કરી છે. આસપાસના વિસ્તારોના સીસીટીવી ફૂટેજની તપાસ પણ ચાલી રહી છે.
આ પણ વાંચો – “ગભરાવાની જરૂર નથી”- હર્ષ સંઘવીની અપીલ વચ્ચે પણ બીજા દિવસે અમદાવાદમાં પેટ્રોલ પંપો પર હાહાકાર
