- ફિલ્મો અને સિરિયલોમાં કામ કરતો રહ્યો અને પોલીસ શોધતી રહી! ‘ઠગ્સ ઓફ હિન્દોસ્તાન’નો એક્ટર અમદાવાદથી પકડાયો
- 10 વર્ષ સુધી કાયદાને ચકમો આપનાર ‘જયેશભાઈ જોરદાર’નો અભિનેતા હેમંત વૈષ્ણવ ક્રાઇમ બ્રાન્ચની જાળમાં
- પેરોલ જમ્પર બનીને ટીવી-ફિલ્મોમાં એક્ટિંગ કરતો રહ્યો: નરોડાનો હેમંત વૈષ્ણવ દસ વર્ષે પોલીસ ગિરફ્તમાં
અમદાવાદ: અમદાવાદ ક્રાઇમ બ્રાન્ચે દસ વર્ષથી ફરાર રહેલા અને પેરોલ જમ્પર જાહેર કરાયેલા વ્યાવસાયિક અભિનેતા હેમંત નગીનદાસ પુરુષોત્તમદાસ વૈષ્ણવની ધરપકડ કરવામાં સફળતા મેળવી છે. 53 વર્ષીય આ આરોપી લાંબા સમયથી કાયદાથી બચીને ફિલ્મ, ટીવી અને થિયેટર ક્ષેત્રમાં સક્રિય રીતે કામ કરતો હતો.
ક્રાઇમ બ્રાન્ચના જણાવ્યા અનુસાર, હેમંત વૈષ્ણવ મૂળ અમદાવાદના નરોડા વિસ્તારનો રહેવાસી છે. જોકે, તાજેતરમાં તે ઘીકાંટા મેટ્રો સ્ટેશન નજીકના એક રહેણાંક વિસ્તારમાં રહેતો હોવાની બાતમીના આધારે પોલીસે તેની શોધખોળ શરૂ કરી હતી. અંતે ગુપ્ત માહિતી અને ટેક્નિકલ સર્વેલન્સના આધારે ક્રાઇમ બ્રાન્ચે તેને ઝડપી પાડ્યો હતો.
આરોપીને ગુજરાત હાઇકોર્ટ દ્વારા 30 દિવસના પેરોલ મંજૂર કરવામાં આવ્યા હતા, પરંતુ પેરોલ પૂર્ણ થયા બાદ તેણે જેલ સત્તાવાળાઓ સમક્ષ આત્મસમર્પણ કર્યું નહોતું. ત્યારબાદ 25 જુલાઈ 2014ના રોજ તેને સત્તાવાર રીતે પેરોલ જમ્પર જાહેર કરવામાં આવ્યો હતો. ત્યારથી તે સતત ફરાર હતો.
પોલીસ તપાસમાં સામે આવ્યું છે કે, ફરાર હોવા છતાં હેમંત વૈષ્ણવે મનોરંજન જગતમાં પોતાની ઓળખ જાળવી રાખી હતી. તેણે આમિર ખાન અને અમિતાભ બચ્ચન અભિનીત ફિલ્મ ‘Thugs of Hindostan’ (ઠગ્સ ઓફ હિન્દોસ્તાન) તેમજ રણવીર સિંહની ફિલ્મ ‘Jayeshbhai Jordaar’ (જયેશભાઈ જોરદાર)માં અભિનય કર્યો હતો. આ ઉપરાંત, તે આગામી ફિલ્મો ‘Lahore 1947’, ‘Metro In Dino’ અને દક્ષિણ ભારતીય ફિલ્મ ‘L2: Empuraan’ સાથે પણ જોડાયેલો હોવાનું સામે આવ્યું છે.
ફિલ્મો ઉપરાંત તેણે ટીવી ક્ષેત્રમાં પણ સતત કામ કર્યું હતું. ‘Wagle Ki Duniya’ (વાગલે કી દુનિયા) અને ‘Mere Sai’ (મેરે સાંઈ) જેવી ટેલિવિઝન સિરિયલોમાં પણ તેણે અભિનય કર્યો હતો. થિયેટર ક્ષેત્રમાં પણ તે સક્રિય રહ્યો હતો અને ‘Yugpurush’ (યુગપુરુષ) તથા ‘Gandhi Viruddh Godse’ (ગાંધી વિરુદ્ધ ગોડસે) જેવાં નાટકોમાં પણ તેણે ભાગ લીધો હતો.
ક્રાઇમ બ્રાન્ચના અધિકારીઓના કહેવા મુજબ, જાહેર જીવનમાં સતત સક્રિય હોવા છતાં આરોપી લાંબા સમય સુધી કાયદાની પકડથી દૂર રહેવામાં સફળ રહ્યો હતો. હાલ પોલીસે તેની સામે આગળની કાનૂની કાર્યવાહી હાથ ધરી છે અને આ દસ વર્ષ દરમિયાન તે ક્યાં-ક્યાં રહ્યો, કોની મદદથી છુપાતો રહ્યો અને કયા નામોથી કામ કરતો હતો તે મુદ્દે વધુ તપાસ શરૂ કરવામાં આવી છે.
આ પણ વાંચો – X પર પ્રતિબંધ છતાં ‘કોકરોચ જનતા પાર્ટી’નું કમબેક: યુવાનોના આક્રોશ વચ્ચે રાજકીય હડકંપ
