બનાસકાંઠા જિલ્લામાં બાળ તસ્કરીનું એક ગંભીર આંતરરાજ્ય રેકેટ સામે આવ્યું છે, જેણે આખા વિસ્તારમાં ચકચાર મચાવી દીધી છે. વડગામ તાલુકાના ધનાપુરા ગામમાંથી અજાણ્યા તસ્કરોએ માત્ર 10 રૂપિયાની લાલચ આપીને 4 વર્ષના માસૂમ બાળકનું અપહરણ કરી લીધું હતું. જોકે, પોલીસની ત્વરિત અને સઘન કાર્યવાહીને કારણે ગણતરીના કલાકોમાં બાળકને હેમખેમ છોડાવી લેવામાં આવ્યો છે અને બે આરોપીઓની ધરપકડ કરવામાં આવી છે.
6 એપ્રિલ, 2026ના રોજ બપોરે ધનાપુરા ગામે રાજસ્થાનના પાલી જિલ્લાના સુઝારામ રાણારામ ભીલ પોતાના પરિવાર સાથે ભિક્ષા માટે આવ્યા હતા. જ્યારે તેઓ ભિક્ષા માટે ગયા ત્યારે તેમના નાના બાળકો એકલા હતા. આ સમયનો લાભ લઈને એક અજાણ્યા વ્યક્તિએ 4 વર્ષના બાળક શૈલેષ લાડુભાઈ લક્ષ્મણભાઈ ગમારને 10 રૂપિયા આપીને ગાડીમાં બેસાડીને અપહરણ કરી લીધું હતું.
ઘટનાની જાણ થતાં જ બનાસકાંઠા પોલીસે તુરંત ઓપરેશન દેવ શરૂ કર્યું. પોલીસની 7 અલગ-अલગ ટીમોએ 50થી વધુ સીસીટીવી કેમેરાની તપાસ કરી અને માત્ર થોડા કલાકોમાં અપહૃત બાળકને વડગામ તાલુકાના મેપડા ગામેથી છોડાવી લીધો.
આરોપીઓ અને તેમની કબૂલાત
પોલીસે બે આરોપીઓની ધરપકડ કરી છે
શૈલેષ લાડુભાઈ લક્ષ્મણભાઈ ગમાર (રહે. મેપડા, તા. વડગામ)
પાબુ ઉર્ફે બાબુ મુંગળાભાઈ મેતાભાઈ ભગોરા (રહે. ખાપરા, તા. અમીરગઢ)
પૂછપરછમાં આરોપીઓએ ચોંકાવનારી કબૂલાત
તેઓ અગાઉ એક મહિનાના નવજાત બાળકને 1 લાખ રૂપિયામાં હિન્દી ભાષી વ્યક્તિને વેચી દીધું હતું.
યુવતીઓના સોદા કરીને તેમના લગ્ન કરાવીને પૈસા કમાતા હતા.
આ બાળકને પણ ટ્રેન મારફતે અન્ય રાજ્યમાં વેચવા માટે અપહરણ કર્યું હતું.
બનાસકાંઠા પોલીસે આ મામલે ગુનો નોંધીને વધુ તપાસ શરૂ કરી છે. પોલીસને શંકા છે કે આ રેકેટમાં અન્ય લોકો પણ સામેલ હોઈ શકે છે. આરોપીઓને કોર્ટમાં રજૂ કરવામાં આવ્યા છે. આ ઘટના બાળ તસ્કરીના આંતરરાજ્ય રેકેટ તરફ નિર્દેશ કરે છે અને બાળકોની સુરક્ષા માટે વધુ સતર્કતાની જરૂરિયાત દર્શાવે છે.
આ પણ વાંચો- 27% OBC અનામત પર સુપ્રીમ કોર્ટમાં સુનાવણી : આવતીકાલે ચુકાદો, ચૂંટણીઓ લંબાશે?
