ગુજરાતમાં સ્થાનિક સ્વરાજની ચૂંટણીના માહોલ વચ્ચે ખેડા જિલ્લાના માતર તાલુકામાંથી એક ચોંકાવનારા સમાચાર સામે આવ્યા છે. માતર વિધાનસભાના ભારતીય જનતા પાર્ટીના ધારાસભ્ય કલ્પેશ પરમારના પોતાના ગામ ભલાડામાં સ્ટેટ વિજિલન્સની ટીમે ત્રાટકીને મોટા પાયે ચાલતા જુગાર અડ્ડાનો પર્દાફાશ કર્યો છે. આ દરોડામાં ધારાસભ્યનો સગો ભત્રીજો મુખ્ય આરોપી તરીકે ઝડપાતા રાજકીય વર્તુળોમાં ભારે ખળભળાટ મચી ગયો છે.
મળતી માહિતી અનુસાર, ભલાડા ગામના હરસિધ્ધિ ફળિયા નજીક આવેલા એક ખુલ્લા ખેતરમાં મોટા પાયે જુગાર રમાતો હોવાની ચોક્કસ બાતમી સ્ટેટ વિજિલન્સને મળી હતી. બાતમીના આધારે વિજિલન્સ ટીમે અચાનક દરોડો પાડતા જુગારીઓમાં નાસભાગ મચી ગઈ. પોલીસે ત્વરિત કાર્યવાહી કરીને સ્થળ પરથી 16 જુગારીઓને રંગેહાથ ઝડપી પાડ્યા હતા.
આ જુગાર અડ્ડો રાજેશ ઉર્ફે લાલો ગુલાબ પરમાર દ્વારા ચલાવવામાં આવતો હતો. તે બહારથી લોકોને બોલાવીને જુગાર રમાડતો હોવાનું પોલીસ તપાસમાં સામે આવ્યું છે. સૌથી મોટી વાત એ છે કે આ મુખ્ય આરોપી રાજેશ પરમાર, માતરના ધારાસભ્ય કલ્પેશ પરમારનો સગો ભત્રીજો છે.
વિજિલન્સ ટીમે સ્થળ પરથી કુલ 22.36 લાખ રૂપિયાનો મુદ્દામાલ જપ્ત કર્યો છે. જેમાં 3.20 લાખ રૂપિયા રોકડા, મોબાઈલ ફોન અને અન્ય વાહનોનો સમાવેશ થાય છે.પોલીસે તમામ 16 આરોપીઓને અટકાયતમાં લીધા છે અને આ મામલે લીંબાસી પોલીસ મથકે કાયદેસર ગુનો નોંધી આગળની તપાસ શરૂ કરી છે.
સ્થાનિક સ્વરાજની ચૂંટણીઓના આગમન સાથે આ ઘટનાએ માતર તાલુકાના રાજકારણમાં ભારે ગરમાવો વધારી દીધો છે. ધારાસભ્યના પોતાના ગામમાં અને તેમના નજીકના પરિવારજન દ્વારા જ આવી ગેરકાયદેસર પ્રવૃત્તિ ચલાવવામાં આવતી હોવાની વાત સામે આવતા વિરોધ પક્ષોએ તીવ્ર પ્રતિક્રિયા આપી છે. એક તરફ રાજ્ય સરકાર કાયદો અને વ્યવસ્થાની કડક વાત કરી રહી છે, ત્યારે સત્તાધારી પક્ષના જ ધારાસભ્યના પરિવાર સામે આ કાર્યવાહી ચર્ચાનો મુખ્ય વિષય બની ગઈ છે.
આ પણ વાંચો – વાવ-થરાદ : યુવતીના પરિવારે લિવ ઈનમાં રહેતા યુવકને આપી તાલિબાની સજા
