અમદાવાદમાં ઓનલાઈન ડેટિંગ એપ દ્વારા છેતરપિંડીનો એક ચોંકાવનારો કિસ્સો સામે આવ્યો છે. મણિનગર વિસ્તારમાં રહેતા અને એક પ્રતિષ્ઠિત ફાર્મા કંપનીમાં ડેપ્યુટી મેનેજર તરીકે કામ કરતા 40 વર્ષીય યુવકને ટિન્ડર એપ પર મળેલી મિત્રતાએ લાખો રૂપિયાની કિંમત ચૂકવવી પડી છે. કરન્સી ટ્રેડિંગમાં મોટો નફો કમાવવાની લાલચમાં આવીને તેણે કુલ 56.35 લાખ રૂપિયા ગુમાવ્યા છે.
મળતી માહિતી અનુસાર, યુવક છેલ્લા પાંચ વર્ષથી ટિન્ડર ડેટિંગ એપનો ઉપયોગ કરતો હતો. આ એપ પર તેનો સંપર્ક આરોહી ગુપ્તા નામની યુવતી સાથે થયો. શરૂઆતમાં સામાન્ય વાતચીત ચાલી, પરંતુ થોડા સમયમાં યુવતીએ યુવકને કરન્સી ટ્રેડિંગમાં રોકાણ કરીને મોટો નફો કમાવવાની સ્કીમ સમજાવી.
યુવતીની મીઠી વાતોમાં ભોળવાઈને યુવકે એક અજાણી ટ્રેડિંગ એપ્લિકેશન ડાઉનલોડ કરી અને પોતાના અંગત દસ્તાવેજો આપીને એકાઉન્ટ ખોલાવ્યું. શરૂઆતમાં તેણે 40 હજાર રૂપિયા જમા કરાવ્યા, જેની સામે એપમાં 43 હજારથી વધુનું બેલેન્સ અને નફો દેખાડવામાં આવ્યો. આથી યુવકને પૂરેપૂરો વિશ્વાસ બેસી ગયો.
આ વિશ્વાસનો લાભ ઉઠાવીને યુવતીએ તેને વધુ રોકાણ કરવા પ્રેરિત કર્યો. નફાની લાલચમાં આવીને યુવકે કટકે-કટકે 35.40 લાખ રૂપિયા જમા કરાવી દીધા. એપમાં તેને 1.24 કરોડ રૂપિયાનો નફો દર્શાવવામાં આવતો હતો. જ્યારે યુવકે આ નફા સહિતની રકમ ઉપાડવા માટે પ્રયત્ન કર્યો, ત્યારે છેતરપિંડીઓએ ટેક્સ, પ્રોસેસિંગ ચાર્જ અને અન્ય બહાના આપીને વધુ પૈસા માંગ્યા.
પોતાના જ પૈસા પરત મેળવવાની મથામણમાં યુવકે વધારાના 17 લાખ અને 3.95 લાખ રૂપિયા પણ જમા કરાવી દીધા. આમ કુલ 56.35 લાખ રૂપિયા ચૂકવ્યા બાદ પણ એક પણ રૂપિયો પરત ન મળતા તેને સમજાયું કે તેની સાથે મોટી છેતરપિંડી થઈ છે.આ ઘટનાની જાણ થતાં યુવકે અમદાવાદ સાયબર ક્રાઈમ સેલમાં ફરિયાદ નોંધાવી છે. પોલીસે ગુનો નોંધીને આરોપીઓની ઓળખ અને તપાસ શરૂ કરી છે.
આ પણ વાંચો – સત્તાધારી ધારાસભ્યના પરિવાર પર જુગારનો આરોપ: માતરમાં 22.36 લાખનો મુદ્દામાલ જપ્ત
