- પોલીસ ઊંઘમાં કે હપ્તાખોરીમાં? ચાંદખેડામાં દારૂ-હુક્કાબારના ગોરખધંધાથી સ્થાનિકોમાં ભારે રોષ
અમદાવાદ: ચાંદખેડા પોલીસ સ્ટેશન વિસ્તારમાં ગેરકાયદે દારૂના કારોબાર સાથે હુક્કાબારની ધમધમતી પ્રવૃત્તિઓ હવે સ્થાનિકોમાં ખુલ્લી ચર્ચાનો વિષય બની ગઈ છે. એવા ગંભીર આક્ષેપો થઈ રહ્યા છે કે બુટલેગરોથી લઈને હુક્કાબારના સંચાલકોને કોઈક અદૃશ્ય ‘પ્રોટેક્શન’ મળી રહ્યું છે.
ચાંદખેડા વિસ્તારમાં ‘વહીવટદાર’ તરીકે ચર્ચામાં આવેલા વિશાલ વાઘેલાનું નામ હવે દારૂના એક સુવ્યવસ્થિત નેટવર્ક સાથે જોડાઈ રહ્યું છે. સ્થાનિક માહિતી મુજબ, વિસ્તારમાં દારૂના અડ્ડા, સપ્લાય ચેઇન અને હુક્કાબારના સંચાલન પાછળ એક મોટું મેનેજમેન્ટ કાર્યરત હોવાના દાવા છે.
સૂત્રોના જણાવ્યા અનુસાર, ડી.ડી. સોલંકી નામનો વ્યક્તિ આ સમગ્ર વિસ્તારમાં “સેટિંગ” અને “મેનેજમેન્ટ” સંભાળતો હોવાની વ્યાપક ચર્ચાઓ છે. ખાસ કરીને દારૂના વેચાણ અને મોડી રાત સુધી ચાલતા હુક્કાબાર અંગે સ્થાનિકોએ અનેકવાર ફરિયાદો કરી હોવા છતાં, કોઈ નક્કર કાર્યવાહી ન થતાં પોલીસ તંત્રની કામગીરી સામે શંકાઓ સેવાઈ રહી છે.
સ્થાનિક રહેવાસીઓમાં ભારે આક્રોશ જોવા મળી રહ્યો છે કે ચાંદખેડા જેવા ઝડપથી વિકસતા વિસ્તારમાં ગેરકાયદે પ્રવૃત્તિઓ ખુલ્લેઆમ ચાલી રહી છે, છતાં પોલીસ આંખ આડા કાન કરી રહી છે. અનેક વિસ્તારોમાં રાત્રિના સમયે દારૂની ડિલિવરી, નશામાં ધૂત યુવાનોની ભીડ અને હુક્કાબારમાં થતી અવરજવર હવે જાણે સામાન્ય બાબત બની ગઈ છે.
હવે સૌથી મોટો સવાલ એ ઊભો થાય છે કે, કાયદો અને વ્યવસ્થા જાળવવાની જવાબદારી જેમના શિરે છે, શું તે તંત્રને ખરેખર આ ગેરકાયદે પ્રવૃત્તિઓની જાણ નથી? અને જો જાણ છે, તો પછી કાર્યવાહી કેમ નથી થઈ રહી? શું આ બધું મીઠી નજર હેઠળ ચાલી રહ્યું છે.
ચાંદખેડા વિસ્તારમાં દારૂ અને હુક્કાબારના આ કાળા કારોબારને લઈને હવે ઉચ્ચ પોલીસ અધિકારીઓ કોઈ નિષ્પક્ષ તપાસ કરશે કે પછી ‘વહીવટી સેટિંગ’ના પડછાયામાં બધું આમ જ ચાલતું રહેશે, તે જોવું રહ્યું.
