- માસૂમ બાળા પર હેવાનિયત આચરનાર નરાધમને ૨૦ વર્ષની સખત કેદ: સુઈગામ સેશન્સ કોર્ટનો ઐતિહાસિક ચુકાદો
વાવ-થરાદ: વાવ-થરાદ પંથકના સુઈગામ વિસ્તારમાં ૧૧ વર્ષની એક સગીરા પર દુષ્કર્મ આચરવાની હૃદયદ્રાવક ઘટનામાં આખરે ન્યાયની જીત થઈ છે. સેશન્સ કોર્ટે આ કેસના આરોપી પ્રકાશ પઢિયારને ૨૦ વર્ષની સખત કેદની સજા ફટકારીને સમાજમાં એક દાખલો બેસાડ્યો છે.
શું હતી સમગ્ર ઘટના?
આ કરુણ ઘટના ત્યારે બની હતી જ્યારે ૧૧ વર્ષની માસૂમ બાળકી તેના બીમાર ભાઈ માટે દુકાને બિસ્કિટ લેવા જઈ રહી હતી. રસ્તામાં આરોપી પ્રકાશ માવજીભાઈ પઢિયાર પોતાના ઘરના ઓટલે બેઠો હતો. તેણે બાળકીને લલચાવવા માટે ૨૦ રૂપિયા આપી પોતાની માટે પણ બિસ્કિટ મંગાવ્યા હતા. જ્યારે બાળકી બિસ્કિટ લઈને પરત આવી, ત્યારે આરોપીએ તેને ઘરની અંદર બોલાવી તેની સાથે દુષ્કર્મ આચર્યું હતું. એટલું જ નહીં, નરાધમે કોઈને પણ જાણ કરવા પર પરિવારને મારી નાખવાની ધમકી પણ આપી હતી.
પરિવારની મક્કમતા અને ન્યાયની લડાઈ
જ્યારે સગીરાએ પેટમાં દુખાવાની ફરિયાદ કરી ત્યારે પરિવારને સત્યની જાણ થઈ હતી. શરૂઆતમાં બદનામીના ડરે સમાધાનના પ્રયાસો થયા હતા, પરંતુ ન્યાય મેળવવા માટે મજૂરી કામ કરતો આ પરિવાર મક્કમ રહ્યો અને પોલીસ ફરિયાદ નોંધાવી હતી. બે દીકરા અને બે દીકરીઓ ધરાવતા આ પરિવાર માટે આ ઘટના અતિશય આઘાતજનક હતી.
કોર્ટનો ઐતિહાસિક ચુકાદો
આ કેસમાં સરકારી વકીલ આર.ડી. જોશીની ધારદાર દલીલોને ધ્યાને રાખીને સેશન્સ કોર્ટના ન્યાયાધીશ પી.એમ. સાયાણીએ આરોપીને પોક્સો (POCSO) અને કલમ ૩૭૬ હેઠળ ૨૦ વર્ષની સખત કેદની સજા ફટકારી છે. આ ઉપરાંત, આરોપીને ૧,૭૫,૦૦૦ રૂપિયાનો દંડ પણ ફટકારાયો છે. જો આરોપી દંડ ન ભરે તો વધુ ૭ મહિનાની સખત કેદ ભોગવવી પડશે. દંડની રકમમાંથી પીડિત બાળકીને વળતર ચૂકવવાનો પણ કોર્ટે હુકમ કર્યો છે.
આ ચુકાદાથી પીડિત પરિવારને ન્યાય મળ્યો છે અને સમાજના અસામાજિક તત્વોમાં કાયદાનો ભય વ્યાપી ગયો છે.
