સુરત : સુરતના પાંડેસરા વિસ્તારમાં નાની તકરારને કારણે ધોરણ 10માં અભ્યાસ કરતા એક વિદ્યાર્થી પર શાળાના ગેટ પાસે જ ચાર સગીરોએ ચપ્પુથી જીવલેણ હુમલો કર્યો છે. આ હુમલામાં ગંભીર રીતે ઘાયલ થયેલો વિદ્યાર્થી હાલ હોસ્પિટલમાં સારવાર હેઠળ છે અને તેની બોર્ડની મહત્વની પરીક્ષા છૂટી જતાં એક વર્ષ બગડવાની ભીતિ સેવાઈ રહી છે.
મળતી માહિતી અનુસાર, ઘટના થોડા દિવસ પહેલાં બની હતી. વિદ્યાર્થી પોતાની માતા સાથે બહેનના સ્કૂલ ફંક્શનમાં ગયો હતો. આ દરમિયાન ગેલેક્સી સ્કૂલ નજીક પૂર્વ આયોજિત રીતે બેઠેલા ચાર સગીરોએ તેના પર તીક્ષ્ણ હથિયારથી ત્રણ ઘા ઝીંકી દીધા હતા. ગંભીર ઈજાગ્રસ્ત વિદ્યાર્થીને તાત્કાલિક હોસ્પિટલ ખસેડવામાં આવ્યો હતો, જ્યાં તેની મેજર સર્જરી કરવામાં આવી છે.
વિદ્યાર્થીના પિતાએ આ મામલે ગંભીર આરોપ લગાવ્યા છે કે હુમલો કરનાર સગીરોએ અગાઉની નાની ટક્કરનો ખાર રાખીને ઓનલાઈન પ્લેટફોર્મ પરથી ચપ્પુ મંગાવ્યા હતા. તેમણે કહ્યું કે આ સગીરોમાં ગુનાહિત માનસિકતા વિકસી રહી છે અને આવા હુમલા રોકવા માટે કડક કાર્યવાહી જરૂરી છે.
પાંડેસરા પોલીસે ઘટનાની ગંભીરતા જોઈને ત્વરિત કાર્યવાહી કરી અને હુમલો કરનારા ચારેય સગીરોને ઝડપી લીધા છે. તપાસમાં બહાર આવ્યું છે કે આમાંથી બે સગીરો હાલ સ્કૂલમાં અભ્યાસ કરે છે, જ્યારે બાકીના બે રખડતા હોવાનું જાણવા મળ્યું છે. પોલીસ હવે તપાસ કરી રહી છે કે આ હથિયારો ખરેખર ક્યાંથી મેળવવામાં આવ્યા હતા અને આ પાછળ કોઈ મોટું નેટવર્ક છે કે નહીં.
પરિવારજનોની માંગ છે કે આવા હિંસક માનસિકતા ધરાવતા સગીરો સામે સખત કાર્યવાહી થાય જેથી ભવિષ્યમાં આવી ઘટનાઓ રોકી શકાય. આ ઘટના ફરી એક વખત શાળા આસપાસની સુરક્ષા અને યુવાનોમાં વધતી હિંસક વૃત્તિ પર ગંભીર પ્રશ્નો ઉભા કરે છે.
આ પણ વાંચો – ટ્રોમા કેર સેન્ટરમાં ભીષણ આગ: 23 દર્દીઓમાંથી 10ના મોત, ઓડિશામાં શોકનો માહોલ
