અમદાવાદ રેલવે પોલીસની લોકલ ક્રાઈમ બ્રાન્ચ (LCB) ટીમે એક કુખ્યાત ગુનેગારને પકડવા માટે દિલ્હીમાં ફિલ્મી અંદાજમાં ઓપરેશન હાથ ધર્યું અને સફળતાપૂર્વક તેને ધરપકડ કરી છે. આ આરોપી અમિત કુમાર સુખદેવ ઠાકુર (મૂળ બિહારનો વતની) ટ્રેનમાં મુસાફરોને નશીલા પદાર્થો યુક્ત પીણાં પીવડાવી બેભાન કરીને તેમનો કિંમતી સામાન, દાગીના, મોબાઈલ અને એટીએમ કાર્ડની ચોરી કરતો હતો.
આરોપીની ધરપકડ માટે રેલવે પોલીસની ટીમે દિલ્હીમાં 7 દિવસ સુધી સતત રેકી કરી. પોલીસ અધિકારીઓએ પોતાની ઓળખ છુપાવીને ફેરિયા અને ફુગ્ગા વેચનારા તરીકે આરોપીના ઘરની આસપાસ રહીને તેની હિલચાલ પર નજર રાખી. જેવો અમિત ઠાકુર તેના ઘરે પહોંચ્યો કે તરત જ પોલીસે તરાપ મારીને તેને કાબૂમાં લીધો.
આરોપીની મોડસ ઓપરેન્ડી ખૂબ જ જોખમી અને ચાલાકીભરી હતી. તે ટ્રેનના સ્લીપર કોચમાં લાંબી મુસાફરી દરમિયાન સાથે બેઠેલા મુસાફરો સાથે મિત્રતા કેળવતો, તેમનો વિશ્વાસ જીતતો અને પછી તેમના ખાણી-પીણીમાં ઊંઘની ગોળીઓ (જેમ કે અલ્ટ્રાઝોલમ જેવી કેફી દવાઓ) ભેળવી દેતો. મુસાફરો બેભાન થઈ જતાં તે તેમની પાસેથી રોકડ, કિંમતી દાગીના, મોબાઈલ અને એટીએમ કાર્ડ ચોરી લેતો. આ ઉપરાંત તે ચોરેલા એટીએમ કાર્ડથી બેન્કમાંથી પૈસા પણ ઉપાડી લેતો હતો, જેનાથી મુસાફરોના જીવને પણ જોખમ ઊભું થતું હતું.
મળતી માહિતી મુજબ, અમિત ઠાકુર સામે ગુજરાત સહિત દેશભરમાં 25થી વધુ ગંભીર ગુનાઓ નોંધાયા છે. હાલમાં રેલવે પોલીસ તેની સઘન પૂછપરછ કરી રહી છે, જેમાં અન્ય અનેક ચોરીના કેસના ભેદ ઉકેલાઈ શકે તેવી શક્યતા છે.
વેસ્ટર્ન રેલવે LCBના ડેપ્યુટી સુપરિન્ટેન્ડન્ટ ઓફ પોલીસ (DySP) ચેતન મુધવાણાએ જણાવ્યું હતું કે, “આરોપી દિલ્હીમાં રિક્ષા ચાલક તરીકે કામ કરતો હતો અને ખૂબ જ ચાલાકીથી ગુનાઓ અંજામ આપતો હતો. અમારી ટીમની સતત મહેનત અને બુદ્ધિપૂર્વકની રણનીતિથી આ કુખ્યાત ગુનેગારને પકડવામાં સફળતા મળી છે. આવા તત્વોને કડક કાર્યવાહી કરીને રેલવે મુસાફરોની સુરક્ષા સુનિશ્ચિત કરવામાં આવશે.”આ ધરપકડથી રેલવેના મુસાફરોમાં રાહતની લાગણી છે અને તે રેલવે પોલીસની કાર્યક્ષમતાનું ઉદાહરણ બની રહી છે.
આ પણ વાંચો – સોલા સિવિલમાં આશ્ચર્યજનક ઘટના, ઉંદરે ડોક્ટરની આંખો કોતરી નાંખી
