- અમદાવાદ-ગાંધીનગરમાં આતંક મચાવનાર આદિત્ય રાઠોડની રાજકોટ SOGએ કરી શાન ઠેકાણે: ₹83 લાખથી વધુનો મુદ્દામાલ જપ્ત
રાજકોટ: સોશિયલ મીડિયા પર રોફ જમાવવા અને હથિયારો સાથે રીલ્સ બનાવવાનો ક્રેઝ વધુ એક ગુનાહિત માનસિકતા ધરાવતા યુવકને જેલના સળિયા પાછળ લઈ ગયો છે. અમદાવાદના કુખ્યાત અને લિસ્ટેડ બુટલેગર કિશોર લંગડાના પૌત્ર આદિત્ય રાઠોડની રાજકોટ સ્પેશિયલ ઓપરેશન ગ્રુપ (SOG) દ્વારા ગેરકાયદેસર હથિયાર સાથે ધરપકડ કરવામાં આવી છે.
રાજકોટના ન્યારી ડેમ રોડ પર આદિત્ય રાઠોડ તેના મિત્ર ધ્રુમિલ ઠાકોર અને એક સગીર સાથે લક્ઝરી ફોર્ડ મસ્ટંગ (Mustang GT) કારમાં રિવોલ્વર લહેરાવીને સોશિયલ મીડિયા માટે વીડિયો શૂટ કરી રહ્યો હતો. ચોક્કસ બાતમીના આધારે પોલીસે દરોડો પાડીને ગેરકાયદેસર હથિયાર અને લક્ઝરી કાર સહિત કુલ ₹83.65 લાખનો મુદ્દામાલ જપ્ત કર્યો છે. પ્રાથમિક પૂછપરછમાં સામે આવ્યું છે કે આ હથિયાર સાથે રહેલા સગીરના કોઈ સંબંધીનું છે. પોલીસે આર્મ્સ એક્ટ હેઠળ ગુનો નોંધી આગળની તપાસ હાથ ધરી છે.
ગુનાખોરીનો કૌટુંબિક ઇતિહાસ અને અગાઉના ગુના
પકડાયેલ આરોપી આદિત્ય રાઠોડનો આખો પરિવાર ગુનાહિત પ્રવૃત્તિઓ સાથે સંકળાયેલો છે. તેના દાદા કિશોરસિંહ રાઠોડ અમદાવાદના જાણીતા બુટલેગર છે, જ્યારે તેના પિતા દિલીપસિંહ પણ દારૂના કાળા કારોબારમાં સામેલ છે. આદિત્ય પણ અવારનવાર હથિયારો અને મોંઘી ગાડીઓ સાથે સોશિયલ મીડિયા પર વીડિયો પોસ્ટ કરીને યુવાધન પર ખોટી ધાક જમાવવાનો પ્રયાસ કરતો હતો. તેની સામે અમદાવાદમાં 3 અને ગાંધીનગરમાં 1 મળીને કુલ 4 ગંભીર ગુનાઓ અગાઉથી જ નોંધાયેલા છે. નવ મહિના પહેલા તેણે શાહીબાગ વિસ્તારમાં પૂરપાટ ઝડપે કાર ચલાવી એક નિર્દોષ એક્ટિવા ચાલકને કચડી નાખ્યો હતો, જેમાં ચાલકનું ઘટનાસ્થળે જ મોત નીપજ્યું હતું.
GLS કોલેજ કાંડ અને પોલીસની ઢીલી નીતિ પર સવાલો
તાજેતરમાં જ 9 માર્ચના રોજ અમદાવાદની પ્રખ્યાત GLS કોલેજ બહાર ઉભેલા વિદ્યાર્થીઓ પર આદિત્યએ હથિયાર વડે જાનલેવા હુમલો કર્યો હતો અને ત્યાં પાર્ક કરેલી થાર ગાડીમાં તોડફોડ કરી હતી. આ ઘટનાના સીસીટીવી ફૂટેજ વાયરલ થયા બાદ તે બે મહિના સુધી ફરાર હતો. આખરે લોકલ ક્રાઇમ બ્રાન્ચે (LCB) તેને ગાંધીનગરની PDPU કોલેજ નજીકથી દબોચી લીધો હતો.
સામાન્ય રીતે ગુજરાત પોલીસ ગુનેગારોની શાન ઠેકાણે લાવવા માટે ઘટનાસ્થળે લઈ જઈને રિકન્સ્ટ્રકશન (ગુનાનું પુનરાવર્તન) કરાવતી હોય છે, જેમાં આરોપીઓ લંગડાતા ચાલતા જોવા મળે છે. પરંતુ 12 મેના રોજ જ્યારે નવરંગપુરા પોલીસ આદિત્યને GLS કોલેજ ખાતે રિકન્સ્ટ્રકશન માટે લાવી, ત્યારે પોલીસની કોઈ ધાક જોવા મળી નહોતી. સોશિયલ મીડિયા પર વાયરલ થયેલા વીડિયોમાં આદિત્ય કોઈ પણ પ્રકારના ડર વગર બિન્દાસ્ત અને સીધા પગે ચાલતો જોવા મળ્યો હતો, જેણે પોલીસની કડક છાપ સામે સવાલો ઉભા કર્યા છે. હાલ પોલીસ તેની વધુ કાયદેસરની પૂછપરછ કરી રહી છે.
આ પણ વાંચો – PM મોદીની UAE યાત્રા : તેલ-ગેસના ભંડારથી લઈને ₹૪૧,૫૦૦ કરોડના તોતિંગ રોકાણ અને સંરક્ષણ સુધીના ઐતિહાસિક કરારો
