અમદાવાદ : શહેરમાં કાયદો અને વ્યવસ્થા જાળવવાની જવાબદારી ધરાવતા પોલીસ તંત્રની અંદરથી જ હવે એક એવી ગોઠવણ બહાર આવી રહી છે, જેને લઈને પોલીસ વર્તુળોમાં ભારે ચર્ચા શરૂ થઈ ગઈ છે. શહેરમાં ફરજ બજાવતા વિપુલ નામના એક કોન્સ્ટેબલ અંગે એવો દાવો થઈ રહ્યો છે કે તેણે પોતાની ફરજની સીમાઓને પાર કરીને એરપોર્ટ, સોલા અને ખાસ કરીને સરખેજ જેવા વિસ્તારોમાં ગેરકાયદેસર પ્રવૃત્તિઓના વહીવટ માટે એક ગોઠવણબદ્ધ નેટવર્ક ઉભું કરી દીધું છે. પોલીસ તંત્રની અંદરથી બહાર આવી રહેલી માહિતીના પગલે હવે સવાલ સીધો રાજ્યના ગૃહ વિભાગ સુધી પહોંચવા લાગ્યો છે કે શું ગૃહમંત્રી હર્ષ સંઘવી આ સમગ્ર મામલે ગંભીર નોંધ લઈને તપાસના આદેશ આપશે?
પોલીસ વિભાગ છેલ્લા ઘણા સમયથી ફરજ બજાવતા જાણકાર અને વિશ્વસનીય સૂત્રો અનુસાર વિપુલે અલગ અલગ પોલીસ સ્ટેશનના વિસ્તારોમાં પોતાના વિશ્વાસુ માણસોને ગોઠવીને એક ગોઠવણબદ્ધ વ્યવસ્થા ઉભી કરી છે. આ ગોઠવણ માત્ર ગેરકાયદેસર પ્રવૃત્તિઓ પર નજર રાખવા પૂરતી નથી, પરંતુ વિસ્તાર મુજબ વસૂલાત, ગેરકાયદેસર ધંધાઓનું સંચાલન અને પૈસાની હેરફેર માટે અલગ અલગ ચેનલ ઉભી કરવામાં આવી હોવાનું ચર્ચાઈ રહ્યું છે. પોલીસ વર્તુળોમાં એવી ચર્ચા છે કે સમગ્ર ગોઠવણ એટલી વ્યવસ્થિત રીતે ગોઠવાઈ છે કે દરેક વિસ્તાર માટે અલગ જવાબદાર માણસો કાર્યરત છે અને સમગ્ર નેટવર્ક ઉપરથી નિયંત્રિત કરવામાં આવે છે.
ખાસ કરીને સરખેજ વિસ્તારમાં આ નેટવર્ક વધુ સક્રિય હોવાનું કહેવામાં આવે છે. સૂત્રો મુજબ અહીં વિપુલે પાંચ જેટલા “વહીવટદારો” ગોઠવ્યા છે અને દરેકને અલગ અલગ જવાબદારી સોંપી છે. કોઈ વિસ્તાર મુજબ વસૂલાત સંભાળે છે, કોઈ ગેરકાયદેસર પ્રવૃત્તિઓની દેખરેખ રાખે છે, તો કોઈ પોલીસની હલચલ અંગે માહિતી પહોંચાડવાનું કામ કરે છે. ચર્ચા એવી પણ છે કે આ વહીવટદારોના નીચે પણ અલગ અલગ માણસો કાર્યરત છે, જેના કારણે સમગ્ર વિસ્તારમાં જાણે એક સમાંતર વ્યવસ્થા ઉભી થઈ ગઈ હોય તેવી સ્થિતિ સર્જાઈ છે.
પોલીસ વર્તુળોમાં ચાલી રહેલી ચર્ચા મુજબ આ સમગ્ર નેટવર્ક પાછળ એક મહત્વની તપાસ એજન્સીમાં ફરજ બજાવતા બાહૂબલી કર્મચારીનું પ્રોટેક્શન હોવાનો પણ દાવો કરવામાં આવે છે. સૂત્રો અનુસાર આ પ્રોટેક્શનના કારણે સ્થાનિક સ્તરે કોઈ મોટી કાર્યવાહી થતી નથી અને સમગ્ર ગોઠવણ નિર્ભય રીતે ચાલતી રહે છે. પોલીસ તંત્રની અંદર એવી ચર્ચા છે કે આ પ્રોટેક્શનને કારણે જ વિપુલ અને તેની ટીમ લાંબા સમયથી પોતાનું નેટવર્ક ચલાવી રહી છે.
આ સમગ્ર ગોઠવણ અંગે એક બીજી ચર્ચા પણ ઝડપથી ફેલાઈ રહી છે. પોલીસ સૂત્રો અનુસાર વિપુલ પોતે મેદાનમાં ઉતર્યા વગર પણ “કંપની”માં બેઠા બેઠા અનેક વિસ્તારોના વહીવટ પર નજર રાખે છે અને પોતાની ટીમ મારફતે સમગ્ર વ્યવસ્થાને નિયંત્રિત કરે છે. બહારથી જોનારને બધું સામાન્ય લાગતું હોવા છતાં અંદરથી આખું નેટવર્ક સક્રિય રીતે કાર્યરત રહે છે એવી ચર્ચા પોલીસ વર્તુળોમાં ચાલી રહી છે.
આ નેટવર્ક સાથે જોડાયેલી સૌથી ચોંકાવનારી ચર્ચા ગેરકાયદેસર વસૂલાતને લઈને છે. પોલીસ સૂત્રો મુજબ માત્ર એક પોલીસ સ્ટેશનના વિસ્તારથી જ લાખો નહીં પરંતુ કરોડો રૂપિયાની ગેરકાયદેસર વસૂલાત થતી હોવાનો દાવો કરવામાં આવે છે. જો આ ચર્ચાઓ સાચી હોય તો એ સવાલ ઊભો થાય છે કે એક સામાન્ય કોન્સ્ટેબલ પોલીસ સ્ટેશનના સ્તરે જ કરોડો રૂપિયાની ગેરકાયદેસર આવક કેવી રીતે ઊભી કરી શકે અને તે પણ લાંબા સમય સુધી કોઈ કાર્યવાહી વગર?
પોલીસ તંત્રમાં વર્ષોનો અનુભવ ધરાવતા અધિકારીઓ માટે પણ આવી ગોઠવણ ઉભી કરવી સરળ નથી. ત્યારે એક કોન્સ્ટેબલ દ્વારા આવું નેટવર્ક ઉભું કરવામાં આવ્યું હોવાની ચર્ચા હવે તંત્રની કાર્યપદ્ધતિ પર જ ગંભીર સવાલો ઊભા કરી રહી છે. શહેરમાં ઝડપથી વિકસતા વિસ્તારોમાં લાંબા સમયથી ચાલી રહેલી ગેરકાયદેસર પ્રવૃત્તિઓ પાછળ હવે કોણ છે તે અંગે સીધી આંગળી આ નેટવર્ક તરફ ઉઠી રહી છે.
આ સમગ્ર મામલો હવે માત્ર પોલીસ સ્ટેશનની અંદરની ચર્ચા પૂરતો રહ્યો નથી. પોલીસ તંત્ર, સ્થાનિક લોકો અને રાજકીય વર્તુળોમાં પણ આ મુદ્દે ચર્ચા તેજ બની રહી છે. હવે જોવાનું એ રહેશે કે રાજ્ય સરકાર અને ગૃહ વિભાગ આ સમગ્ર મામલે શું પગલાં લે છે. કારણ કે પોલીસ તંત્રની અંદર ઉભું થયેલું આ “વહીવટી સામ્રાજ્ય” હવે એવો મુદ્દો બની રહ્યો છે જેને લાંબા સમય સુધી છુપાવી રાખવો શક્ય જણાતો નથી.
આ પણ વાંચો – વડોદરા : બકરાવાડીમાં ઘરકંકાસમાં પતિએ પત્નીની ચાકુથી કરી હત્યા, બે બાળકો બન્યા અનાથ
