- મોબાઈલ ચોરી અને ગુમ થવાના કેસોમાં ઝડપી ટ્રેસિંગ માટે 61 અધિકારીઓને અપાઈ તાલીમ
અમદાવાદ : નાગરિકોની સુરક્ષા અને ટેકનોલોજીના અસરકારક ઉપયોગ દ્વારા ગુનાખોરી પર નિયંત્રણ લાવવા અમદાવાદ ક્રાઈમ બ્રાન્ચ વધુ સક્રિય બની છે. આ દિશામાં આજે ક્રાઈમ બ્રાન્ચ ખાતે ‘CEIR’ (Central Equipment Identity Register) પોર્ટલના તાજેતરના અપગ્રેડ અને નવી સુવિધાઓ અંગે વિશેષ અવેરનેશ પ્રોગ્રામ યોજાયો હતો.
આ કાર્યક્રમમાં ક્રાઈમ બ્રાન્ચના વિવિધ યુનિટના કુલ 61 અધિકારીઓ અને કર્મચારીઓ હાજર રહ્યા હતા. કાર્યક્રમનો મુખ્ય ઉદ્દેશ્ય મોબાઈલ ચોરી અને ગુમ થયાના કેસોમાં ઝડપી કાર્યવાહી કરીને નાગરિકોને રાહત આપવાનો હતો.
આ અવસર પર ભારત સરકારના ડિપાર્ટમેન્ટ ઓફ ટેલિકોમ્યુનિકેશન દ્વારા વિકસાવવામાં આવેલા CEIR પોર્ટલની નવી ટેકનિકલ વિશેષતાઓ અંગે વિસ્તૃત માર્ગદર્શન આપવામાં આવ્યું હતું. અધિકારીઓને સમજાવવામાં આવ્યું કે આ પોર્ટલના ઉપયોગથી ચોરાયેલા મોબાઈલ ફોનને દેશભરના તમામ નેટવર્ક પર તરત જ બ્લોક કરી શકાય છે.
પોર્ટલની મદદથી જ્યારે પણ ચોરાયેલા ફોનમાં નવું સિમ કાર્ડ નાખવામાં આવે છે, ત્યારે પોલીસને તરત એલર્ટ મળે છે, જેના કારણે ફોન રિકવર કરવાની પ્રક્રિયા ઝડપી બને છે. સાથે જ, મોબાઈલ બ્લોક થવાથી તેનો ગેરકાયદેસર પ્રવૃત્તિઓમાં ઉપયોગ થતો અટકાવી શકાય છે.
આ ઉપરાંત, નાગરિકો માટે પણ આ પોર્ટલ પારદર્શક સિસ્ટમ પૂરી પાડે છે, જેમાં તેઓ પોતાની ફરિયાદની સ્થિતિ ઓનલાઈન જાણી શકે છે અને ફોન મળી આવે તો તેને અનબ્લોક પણ કરી શકે છે.
અમદાવાદ ક્રાઈમ બ્રાન્ચ દ્વારા જણાવાયું હતું કે આધુનિક ટેકનોલોજીના ઉપયોગથી મોબાઈલ સ્નેચિંગ અને ચોરીના કેસોમાં નોંધપાત્ર ઘટાડો લાવવા પ્રયાસ કરવામાં આવી રહ્યો છે. CEIR પોર્ટલના અપગ્રેડ બાદ આવનારા સમયમાં આવા ગુનાઓ ઉકેલવામાં વધુ સફળતા મળવાની સંભાવના વ્યક્ત કરવામાં આવી છે.
આ પણ વાંચો – ગુજરાતમાં પારિવારિક કાયદાઓમાં મોટો ફેરફાર : UCC બિલ મંજૂર, વારસાઈમાં સમાન અધિકાર
