- Gujarat Exclusive ઈમ્પેક્ટ: એરપોર્ટ ‘મની હાઇસ્ટ’ કેસમાં આખરે FIR
અભિષેક પાંડેય, અમદાવાદ : Gujarat Exclusive દ્વારા બહાર લાવવામાં આવેલી એસવીપીઆઈ એરપોર્ટ પરની ‘મની હાઇસ્ટ’ જેવી સોનાની ચોરીની ઘટનાએ હવે સત્તાવાર દિશા પકડી છે. સ્ટોરી પ્રકાશિત થયા બાદ 4 મેની સાંજે આ સમગ્ર મામલે FIR નોંધાઈ છે.
સરદાર વલ્લભભાઈ પટેલ એરપોર્ટ ગોલ્ડ હાઈસ્ટ કેસમાં આખરે એરપોર્ટ પોલીસ દ્વારા FIR દાખલ કરવામાં આવી છે. આ FIR કેરિયર કંપની સિકવલ લોજિસ્ટિક્સ લિમિટેડના સિક્યુરિટી મેનેજર દ્વારા આકાશા એર સામે નોંધાવવામાં આવી છે. FIR મુજબ, ચોરાયેલો માલ જેમ્સ, જ્વેલરી અને લાઇફસ્ટાઇલ બ્રાન્ડ ટાઇટન કંપનીનો હતો. આ જ્વેલરી અમદાવાદ સ્થિત RBZ જ્વેલર્સ લિમિટેડ ખાતે તૈયાર કરવામાં આવી હતી અને તેને બેંગલુરુ મોકલવામાં આવી રહી હતી.
જો કે, અહીં સૌથી મોટો વિસંગત મુદ્દો માલના વજન અને કિંમતને લઈને સામે આવ્યો છે. Gujarat Exclusiveને મળેલી માહિતી મુજબ, આ કેસમાં અંદાજે 20 કિલો સોનાની ચોરી થઈ હતી, જ્યારે FIRમાં માત્ર 2.107 ગ્રામ અને 562 મિલિગ્રામ સોનાનો જ ઉલ્લેખ કરવામાં આવ્યો છે. તેની અંદાજિત કિંમત આશરે રૂ. 2 કરોડ 58 લાખ દર્શાવવામાં આવી છે.
સૂત્રોના જણાવ્યા મુજબ, ઉપલબ્ધ તથ્યો અને નોંધાયેલી FIR વચ્ચે અનેક લૂપહોલ્સ અને વિસંગતતાઓ છે, જે ભવિષ્યમાં મોટા ખુલાસાઓ તરફ ઈશારો કરે છે. FIR તથા છેલ્લા 15 દિવસ દરમિયાન થયેલી ગતિવિધિઓ અંગે પણ અનેક મુદ્દાઓ હજુ સુધી સ્પષ્ટ થયા નથી.
નોંધનીય છે કે Gujarat Exclusiveએ સૌપ્રથમ આ સમગ્ર ઘટનાને પ્રકાશમાં લાવી હતી. ત્યારબાદ હવે FIR નોંધાતા કેસને સત્તાવાર ગતિ મળી છે. તેમ છતાં, FIRમાં દર્શાવાયેલા તથ્યોને લઈને ઊભા થયેલા પ્રશ્નો આ કેસને વધુ જટિલ બનાવી રહ્યા છે. હાલ પોલીસ દ્વારા વધુ તપાસ હાથ ધરવામાં આવી રહી છે.
