અમદાવાદ : શહેરના સરખેજ પોલીસ સ્ટેશન વિસ્તારમાં ગેરકાયદેસર પ્રવૃત્તિઓ અંગે ફરી એક વખત ગંભીર પ્રશ્નો ઊભા થયા છે. વિશ્વસનીય સૂત્રો અનુસાર, સરખેજ પોલીસ સ્ટેશનમાં નવા વહીવટદારની એન્ટ્રી થયા બાદ માત્ર ત્રણ દિવસ માટે ગેરકાયદેસર પ્રવૃત્તિઓ બંધ કરાવવામાં આવી હતી, પરંતુ ત્યારબાદ વધુ મોટી રકમ સાથે આખી વહીવટી ગોઠવણી ફરી શરૂ કરી દેવામાં આવી હોવાનું ચર્ચાઈ રહ્યું છે.
મળતી માહિતી મુજબ, આ નવા વહીવટદાર માત્ર સરખેજ વિસ્તારમાં જ નહીં પરંતુ સોલા એરપોર્ટ પોલીસ સ્ટેશન વિસ્તારમાં પણ ગેરકાયદેસર પ્રવૃત્તિઓના વહીવટ સાથે જોડાયેલા હોવાનું કહેવાય છે. શરૂઆતમાં ત્રણ દિવસ સુધી દારૂ સહિતના ગેરકાયદેસર ધંધાઓને બંધ કરાવી સમગ્ર સિસ્ટમને ફરીથી 10 ટકાના વધારા સાથે દારૂના અડ્ડાઓ સહિત અન્ય ગેરકાયદેસર કામગીરીના સ્ટેન્ડો ધમધમવા લાગ્યા છે.
સૂત્રોના દાવા મુજબ, અગાઉ ચાલતી રકમ કરતા લગભગ 10 ટકા જેટલી ધરખમ રકમ સાથે ગેરકાયદેસર ધંધાઓને લીલી ઝંડી આપવામાં આવી છે. ખાસ કરીને સરખેજ વિસ્તારમાં “આસિફ” નામના વ્યક્તિના વિદેશી દારૂના ધંધા સહિત લગભગ 35 જેટલા દેશી દારૂના અડ્ડાઓ એક વખત ફરીથી સક્રિય થઈ ગયા છે.
તમને અગાઉના રિપોર્ટમાં અમે જણાવ્યું છે કે, આ સમગ્ર વહીવટી વ્યવસ્થા સંભાળવા માટે વિપુલ નામના વહીવટદારે પોતાની નીચે અન્ય અડધા ડઝન જેટલા વહીવટદારોની નિમણૂક કરી દીધી છે, જે તમામ વહીવટદારો પણ હવે પોત-પોતાના વિસ્તારમાં ગેરકાયદેસર ધંધાઓ ધમધમતા રહે તેની તાકિદ રાખવા માટે મેદાનમાં ઉતરી ગયા છે. વિપુલે પેટા-વહીવટદાર સિવાય પણ પોતાની સિસ્ટમને મજબૂત બનાવવા માટે અનેક અન્ય લોકોની નિમણૂક કરવામાં આવી છે જેથી દરેક વિસ્તારમાંથી આવતી આવક અને પ્રવૃત્તિઓ પર નજર રાખી શકાય.
હવે સૌથી મોટો પ્રશ્ન એ ઊભો થાય છે કે સરખેજ જેવા મોટા વિસ્તારમાં ચાલતી આ ગેરકાયદેસર પ્રવૃત્તિઓ અંગે ઉચ્ચ પોલીસ અધિકારીઓ અજાણ છે કે પછી જાણતા હોવા છતાં આંખ આડા કાન કરવામાં આવી રહ્યા છે? આગામી દિવસોમાં આ મુદ્દે વધુ ગંભીર ક્રાઈમ નેક્સેસના ખુલાસાઓની શક્યતાઓને પણ નકારી શકાય તેમ નથી.
આ પણ વાંચો – વિપુલનું ‘વહીવટી સામ્રાજ્ય’! સરખેજથી એરપોર્ટ, સોલા સુધી વિપુલના નેટવર્કની ચર્ચા
